Skills Competition buatsaih a ni

Labour, Employment, Skill Development & Entrepreneurship (LESDE) department chuan August 31, Thawhlehni khan Industrial Training Institute, Aizawlah Skills Competition an buatsaih a, mi 59 telin, regional skill competition-a tel turin mi 21 thlan an ni.

Skills Competition-ah hian thil (trade) chi hrang hrang 12 siam hmangin mi 59 an intihsiak a; chu'ng aṭang chuan a ti ṭha zual mi 21 thlan niin, chu'ng mite chu Mizoram aiawha regional level-a intihsiaknaah an inlan ang. Regional competition an paltlang chuan national level competition-ah an tel dawn a, chu chu an paltlang leh chuan World Skill Competition 2022, Shanghai, China-ah India aiawhin an tel dawn a ni.

Thawhlehni tlai khan Skills Competition khàrna inkhawm buatsaih a ni a, LESDE minister Lalchhandama Ralte-in a hmanpui.

LESDE secretary Lalramsanga Sailo kaihhruai khàrna inkhawmah hian Lalchhandama Ralte chuan, Mizo ṭhalaite theihna leh thiamna hman ṭangkai a pawimawh thu a sawi a, "Khawvel hmasawnnain a ken te, an theihna sang takte hi khawvel hmuhah pho chhuak theia mi dangte hma hruaitu an nih theih nan hman ṭangkai a ṭul. An talent hâi chhuak zel turin he Skills Competition hian ṭhalaite a cho a ni," a ti.