Khawzawlah restricted area kalpui

Khawzawl District Disaster Management Authority chu nimin khan an chairman CC Lalchhuangkima, bawrhsap hoin DC pisaah an ṭhukhawm a, an thutlukna angin nizan dar 7 aṭang khan Khawzawl khawpui chu restricted area-a puan a ni.

Ṭhutkhawmah hian Khawzawl district-a Covid-19 vei an pun zel avangin hmalak dan tur an ngaihtuah a; tun hnaiah an district chhung, a bikin Khawzawl khaw chhungah Covid-19 vei an pun chak avangin inkhuahkhirhna khauh zawk nizan dar 7 aṭanga kalpui turin an rêl a ni. Restricted area-a puan chhungin swab sample endik rûnpui kalpui turin an rél bawk.

Restricted area huam chhungah chhiat tawhna leh medical emergency tih lohah chuan mahni in pawn lamah chhuah phal a ni dawn lo a, hna pawh mahni in compound chhungah chiah thawh phal a ni ang. Dawr hawn phal a ni dawn lo a, mamawh bik neite ngaihven turin an awmna veng task force-te an chah a; loh theih loha sorkar pisa kal turte pawhin office kal phalna order, hming hmerha office hotute siam ken zel tur a ni.

Khawzawl district-ah hian nimin tlai dar 4 thleng khan Covid-19 vei mek mi 85 an awm a, chu'ng zinga mi 55 chu Khawzawl khawpui chhunga mi an ni. Hripui vei mek mi 85-te chu tun hnai ni nga kal ta chhunga hmuh chhuah vek a ni.