KHAWTHLIR

YMA ngen rél
Fairelbel Utilization Committee chu nimin khan an chairman Dr Lalhriatzuali Ralte, Aizawl bawrhsap hoin DC conference hall-ah an ṭhu a; Fairelbel Charity Fund Rs. 23,45,000 hmanga Aizawl véng hrang hranga Covid-19 vanga harsatna tawk zualte chhawmdawl dan tur an sawiho. Veng tina chhawmdawl ngaite dap chhuak turin YMA-te ngen ni se, an ti.

Mi pakhat thih belh
Covid-19 vei enkawl lai Nuziki (68) w/o Lalnghinglova, Maubawk chu nimin zing dar 6:45 khan State Referral Hospital-ah a thi a, Mizorama hripui vanga thi 218-na a ni. Covid-19 vei a ni tih July 20, 2021 khan hmuh chhuah niin, July 29 aṭangin SRH-ZMC-ah enkawl ṭan a ni a; nimin chhun dar 12 khan vui a ni.

Thisen pe
Nimin khan ṬKP, Hnahthial South bial chuan Lunglei Civil Hospital tan thisen unit 56 an pe a, petute mipa 49 leh hmeichhia pasarih an ni. ṬKP, Hrangchalkawn bial pawhin Christian Hospital, Serkawn tan thisen unit 43 an pe a, petute mipa 28 leh hmeichhia 15 an ni.

Kawngpui enfiah
Lunglei Road Protection Squad chuan nimin khan Lunglei chhim lama kawngpui hman dan an endik a, in sakna bungrua kawng sira dahtute leh lirthei workshop neitute chu an lirthei siam tur leh bungruate kawng kama dah tawh lo turin an hriattir. Khawtlang hruaitute chuan, tuihâwk luankawr khuh ṭhat ngaite khuh ṭha tura hmalak an tum thu an sawi bawk.

Tanpuina sem
Nimin khan minister of state Robert Romawia Royte-in Aizawl Two Wheeler Taxi Association (ATTA) hnena an member harsa zualte ṭanpuina tura a pek chu AMC councillor Chuauzikpuii'n a dawng turte hnenah a hlân. Chuauzikpuii hian hmai tuamna leh blood pressure endikna a pe nghal bawk. Ṭanpuina hi ATTA member mi 22 hnenah Rs. 2,000 ṭheuha sem a ni.