Tlabung leh a chhehvelah buhfai a tlêm

Lunglei leh Tlabung inkar kawngpui chu hmun tam takah a chhiat em avangin August 8, 2021 aṭang khan Tlabunga dah tur buhfai phur ṭhin truck neitute'n kawngpui an zawh ngam tawh lo a, hei vang hian Tlabungah tun September thla daih buhfai a awm tawh lo.

Tlabung aṭanga thu dawn danin, tun dinhmunah Tlabunga Supply kudamah buhfai quintal 1,180 vel a awm mek a, chutih laiin, Tlabung leh a chhehvelte buhfaia thla khat tla chu quintal 2,100 a ni a, September thla daih buhfai an nei tawh lo a ni.

Khawthlangtuipui Group YMA chuan thuchhuah siamin, Tlabung-Lunglei kawngpui NH-302 chu Tlabung leh Mizoram khawthlang lama khaw tam tak châk lâkna awmchhun a nih thu an tarlang a, "Kan mar tiphutu a ni tak meuh. Tun hma aṭang tawhin ngaihsak a hlawh ngai lo, tih theih turin thawm ṭhat a ni ngai meuh lo a, kum tin fûr apiangin Tlabung leh a chhehvel khaw mipuite'n harsatna nasa tak kan tuar tawh ṭhin a ni," an ti.

NH kawngpui enkawl hna NHIDCL kuta dah a nih hnuah Tlabung leh a chhehvel mipuite'n beiseina sang tak an nei tih sawiin Group YMA chuan, kawng chhe zual thawm ṭhat nan cheng nuai 180 ruahman a ni pawh lawmawm an tih thu an sawi a; "Mahse, lirthei lian tan rit phur chunga zawh theih loh khawpa a chhiat tâk avang leh kawng thawm ṭhat hna thawh a chak theih loh avangin, kumin August 8 aṭang khan Tlabunga dah tur buhfai phur ṭhinte'n kawng an zawh ngam tawh lo," an ti a, tun thlengin truck-te chu an la tlân loh thu an sawi.

Khawthlangtuipui Group YMA hruaitute chuan nimin khan Lunglei-Tlabung kawng chu an enfiah a; hna thawktute'n harsatna an tawhte chu an hriatthiampui rualin, tun aia chak zawkin kawng chhe zualte chu thawm ṭhat theih nia an ngaih thu an sawi. Hna thawktute chu chak zawka kawng thawm ṭha turin an ngen nghal bawk.