Swab sample endik rûnpuiah Covid-19 vei mi 2,917 hmu tawh
Integrated Disease Surveillance Programme (IDSP) nodal officer Dr Pachuau Lalmalsawma, Covid-19 thupuangtu ni bawk chuan, July 20, 2021 aṭanga August 31 thlengin Aizawl leh a chhehvel khua/veng 75-a swab sample endik rûnpuiah Covid-19 vei mi 2,917 hmuh chhuah a nih tawh thu a tarlang.
Dr Pachuau Lalmalsawma chuan, sample endik rûnpui chu sorkar inhawnna leh ruahmanna bakah, kil tin aṭanga ṭula hriatna avanga kalpui a nih thu sawiin, "A hautakna awm bawk mah se, a hlâwkna hi mass testing neihna hmun apiangah hmuh a ni," a ti a; sample 97,372 endik aṭangin hripui vei mi 2,917 hmuh chhuah a nih tawh thu leh hmuh chhuah zat chu 2.99% a nih thu a sawi.
IDSP Nodal Officer sawi danin, August 31, 2021 thleng khan Aizawla veng 62 leh khaw hrang hrang 13-ah sample endik rûnpui hi neih a ni tawh.
Sample endik runpui neih ṭhatna sawiin Dr Pachuau Lalmalsawma chuan, "Mass testing ṭangkaina chu hripui vei hmuh chhuah mi 2,917-te hi a hranpaa in test lem lo turte an ni ber a, hmuh chhuah ni ta lo se positive nih inhre miah loin zalên takin lo thehdarh ta se, tun ai hian kan dinhmun a chhe zual dawn a ni," a ti.
Mipui nâwlpui endik tamna hmunah negative tam tak hmuh a nih ṭhin avangin positivity rate pawh a tlakhniam phah thu leh khawtlang dinhmun a tihlan ṭhin thu a tarlang.
Dr Pachuau Lalmalsawma chuan, mass test-a negative-te khuahkhirh an nih loh avangin Covid-19 a darh anga sawi a awm tih sawiin, "Mass testing hi neih ni ta lo se, veng leh khaw hrang hranga positive hmuh chhuah mi 3,000 deuh thawte hian zalen takin an thehdarh zawk ang.
Mass testing avangin anni hi dah hran nghal niin, an contact, kái palh theia awm ho, negative-te thlenga khung hrana an awm leh test an ni zel hi a hlâwk hle zawk a ni," a ti. Mass testing chu thâwk leh khata veng leh khuaa Covid-19 rehna damdawi a nih loh thu leh a ziaawmna tura hmalakna bul ṭanna chauh a nih thu a sawi bawk.