COVID-19: Mizoram dinhmun Hripui vei 879 hmuh belh a ni

August 31, Thawhlehni khan Mizoramah hripui vei mi 879 hmuh chhuah a ni a, August thla chhungin mi 21,073 hmuh niin, hmuh chhuah tam ber thla a ni. Nimin khan hripui vei dam tawh mi 545 chhuahtir an ni a, hripui vangin mi pakhat a thi.

Covid-19 vei hmuh tharte chu mipa 372 leh hmeichhia 507 an ni a; ZMC laboratory-a hmuh chhuah 141, TrueNAT hmanga hmuh 28, RAT hmanga hmuh 707 leh Fluorescent Immunoassay (FIA) hmanga hmuh pali an ni.

August 31 khan India ramah Mizoram aia Covid-19 vei hmuh chhuah tamna state panga - Kerala, Maharashtra, Tamil Nadu, Karnataka leh Andhra Pradesh-te a awm a; hmarchhak state pariat zingah hmuh chhuah tamna ber a ni leh bawk. Hripui vei hmuh thar 879-te chu symptom nei 472 leh nei lo 407 an ni a; tualchhunga kái 870 leh tun hnaia state pawn aṭanga rawn lut pakua niin, tualchhunga hri kái zingah kàina chin hriat loh mi 404 an awm.

IDSP record angin, Mizoramah Covid-19 vei 59,999 hmuh chhuah a ni tawh a, mipa 30,643 leh hmeichhia 29,356 an ni. Nimin tlai dar 5 thleng khan mi 50,715 (84.53%) chhuahtir an ni tawh a, mi 218 (0.36%) thi tawhin, enkawl mek mi 9,066 (15.11%) an awm. August 31, Thawhṭannia sample endik dan chu - ZMC laboratory-ah 983, TrueNAT hmangin district pariatah 417, RAT hmangin district 11-ah 8,178 leh FIA hmangin 26 a ni a, a vaiin sample 9,604 a ni. Sample endik aṭanga hripui vei hmuh chhuah 879 chu 9.15% a ni a, ZMC-ah 14.34%, TrueNAT-ah 6.71%, RAT-ah 8.63% leh FIA-ah 15.38% a ni.

District tinah hripui vei hmuh chhuah dan chu - Aizawlah mi 461, Lungleiah 118, Lawngtlaiah 81, Kolasibah 76, Mamitah 70, Siahaah 26, Khawzawlah 19, Serchhipah 15, Champhaiah 11 leh, Saitual leh Hnahthialah pakhat ve ve a ni. Aizawla veng 63 leh khaw dang 56-a mite an ni a; Lungleia veng 14, Kolasib-a veng 10, Lawngtlaia veng pakua leh Champhaia veng paruka mite an lang.

Covid-19 vei hmuh chhuah thar 879 zingah nausen kum khat tling lo 14 telin, a zatvein symptom an nei a, a naupang ber chu ni li mi a ni. Kum 80 chung lam mi paruk an awm a, a upa ber chu kum 86 a ni. Kumin August thla chhungin Covid-19 vei mi 21,073 hmuh chhuah a ni a, chawhrualin ni tin mi 679 chuang hret (679.77) hmuh chhuah an awm ang a ni. Mizorama Covid-19 vei hmuh tawh zat 59,998 chu kum 2011 chhiarpui angin, Mizorama mi 1,000 zelah hripui vei mi 54 an awm ang a ni.

Nimin khan tlai dar 5 thlengin hripui laka fihlim tawh mi 545 chhuahtir an ni a; Aizawl district-ah mi 364, Kolasib district-ah 70, Siaha district-ah 38, Mamit district-ah 37, Lawngtlai district-ah 29 leh Serchhip district-ah pasarih an chhuak.