March 27-ah Zophai enfiah dawn

Ministry of Home Affairs (MHA) bultuma Assam leh Mizoram sorkar aiawhte'n MZP-in Zofate Chawlhbuk sak an tumna hmun, Zophai an enfiah hun atan March 27, 2018 ruat a ni.

Tarlan tawh angin, MHA bultuma March 20, Thawhlehnia New Delhi-a Mizoram leh Assam chief secretary-te inbiaknaa thutlukna siam angin, Zophai hi March 27-ah Union Home Joint Secretary (NE) kaihhruaina hnuaiah Mizoram leh Assam sorkara Home Secretary-te'n an tlawh dawn a; Survey of India official-te pawhin an ṭawiawm dawn a, thil awm dan a hmunah an zir chiang dawn a ni.

Vanglaini palai zawhna chhangin inbiaknaa tel Mizoram sorkar official-te chuan, MHA thuchhuahah Zofate Chawlhbuk sak tumna hmun Kachurtal tia ziah a nih chhan chu, official document-a a inziah dan a nih thu an sawi a, "Zophai tih hi official document-ah ziah lan a awm lo. Kachurtal tih chu hmanlai document aṭanga a inziah dan a ni," an ti.

Zophaiah hian Mizoram leh Assam Police-te an la awm reng a, Mizoram Police-te chu 1st IR Bn. commandant HL Thangzuala hoin company hnih an awm a ni. HL Thangzuala hnen aṭanga thudawn danin, Assam Police lam chu an tlem telh telh a, chawlhbuk sak tumnaah tak phei chuan an awm tawh lo.

Hetih lai hian, Zophaia chawlhbuk sak tumtu MZP chuan ramri chungchangah April 15, 2018 thleng Mizoram sorkar leh Assam sorkar hmalakna an ngaichâng dawn tih an puang.

MZP hruaitute chu nimin khan an president L Ramdinliana Renthlei kaihhruaiin MZP Pisapuiah an ṭhukhawm a; Zophaia Zofate Chawlhbuk sak a nih theih nana hmalak zel dan tur an ngaihtuah.

MZP chuan, MHA kaihhruainaa Mizoram leh Assam chief secretary-te inbiaknaah hmasawnna nei loa status quo kenkawh tura thlutlukna an siam chu Mizoram tana ṭha lo tur zawng zela ngaih theih tura thutlukna niah an ngai tih an tarlang.

MZP chuan, status quo maintain a nih dawn chuan Assam sorkarin Mizoram chhunga sikul, police outpost, refugee camp, biak-in an sakte leh kut an lo thlak tawh zawng zawngte chu April 15, 2018 chhung ngeia ṭhiah an phût a, "Hun tiam chhunga Assam sorkarin a ṭhiat lo a nih chuan Zofate Chawlhbuk sa turin hma kan la nghal ang," an ti.

MZP chuan, Chief Secretary pahnihte inbiaknaa Zophai hmun hminga ‘Kartuchal’ tih a ni chu hriatthiam harsa an tih thu an tarlang a; Mizoram Assembly session neih mekah Inner Line Reserve (sq.m. 509) chu Mizoram chhung ngei a nih thu leh lak let a nih theih nana hmalak a nih theih nan resolution pass ngei an phût thu an sawi. Bangladesh aṭanga dan loa India rama lut, Mizorama awmte chu an ramah haw turin an hriattir bawk.

MZP hian chawlhbuk sak ngei a nih theih nan, Assam sorkarin Mizo zirlaite leh media mite kut an thlak duh lohna lantir nan vawiin hian Vanapa Hall kawtah sit-in demonstration an huaihawt dawn a ni.