Lei chimah a mawhphurtu zawn chhuah a la ni lo - PWD Minister

PWD minister Lal Thanzara chuan, Mizorama lei chimah a mawhphurtu zawn chhuah a la nih loh thu, MNF member Lalruatkima zawhna chhangin House a hrilh.

Lalruatkima chuan, Mizo­ramah kum 2014-2018 chhungin ṭum ruk lei a chim tawh a, mi pathumin nunna an chán thu sawiin, "Lei chim hi kan duh reng vang chu a ni lo. A mawhphurtu zawn chhuah a ni tawh em? A kilhna rûkbo vang te, mipui auh chim nite sawi a ni ṭhin. A chhan dik tak puangzar turin sorkarin ruahmanna a siam thei lo em ni?" a ti.

PWD Minister chuan, lei chim, a bikin Sesawng leh Khawruhlian inkara Tuirini lei chim chhan chu chhui mek a nih thu sawiin, "A mawhphurtu zawn chhuah a la ni lo. A chim chhan sawi chian theih pawh a la ni lo," a ti a; Tuirini lei chim vanga thi chu PWD-in Rs. 20,000-a an ràl thu a sawi.

Lal Thanzara sawi danin, PWD engineer pakhat chuan tunah hian bridge engineer-ah master degree a zir mek a, chu bakah chuan, lei dawh lama mithiam bik an awm theihna turin ruahmanna siam a ni.

Tun dinhmunah national highway-ah lei 52 a awm a, chung zinga 13 chu lei rinawm lo, siamṭhat ngai a ni. Lei rinawm lote chu siamṭhat mek a ni a, estimate chu cheng nuai 271.8 niin, cheng nuai 46.65 hmuh a ni tawh.

Lei thar NH-44A-ah Dial­dawk lei, NH-150-ah Tuirini lei, NH-502A-ah Ruankhum lei, Ngengpui lei, Bawklawk lei, Lunghauka lei, Khawrawp lei, Hmawngbu lei, Zochate lei leh Zocha leite dawh mek a ni. Lei thar dawh mek atana estimate chu cheng nuai 3628 a ni a, cheng nuai 233.53 hmuh tawh a ni.