MIZOFED-in supplier aṭanga buhfai an lei ; FCSCA dept. hnenah an supply ve leh ṭhin

Cooperation minister Vanlal­awmpuii Chawngthu chuan MNF member Dr K Beichhua zawhna chhangin, MIZOFED-in mi panga hnen aṭangin buhfai an lei a, chu chu Food, Civil Supply & Consumer Affairs (FCSCA) department hnenah an hralh chhawng ve leh ṭhin tih House a hrilh.

Vanlalawmpuii sawi danin, MIZOFED-in Mizoram sorkarah August 8, 2016 aṭangin buhfai an supply ṭan a; buhfai chu mi panga hnen aṭangin an lei a, a leina rate chu phai lama buhfai rate danglam ang leh FCSCA department-a supply-na rate a danglam angin a danglam ṭhin.

MIZOFED chuan August 31, 2017 aṭangin buhfai quintal khat Rs. 2,750-in Supply department hnenah an supply a; chumi hmalak zawng chuan quintal khat Rs. 2,500-in an pe ṭhin a ni.

Dr K Beichhua chuan, MIZO­FED-in direct-a lei loa mi dang ta a lei chhawn leh chu thil ṭha ni loa a hriat thu sawiin, "Hetianga kual deuha tih hian thil dik lo awmna chance a sang a ni," a ti.

Hemi chungchangah hian Cooperation Minister chuan, MIZOFED-in anmahni suma supply turin hma la mah se, sum indaih lohna vangin an tih theih loh thu sawiin, "FCSCA department hian buhfai hi thla khatah qtl. 4,000 chuang an mamawh a, kan sum chuan kan supply thei lo," a ti a; mi dang ta lei chhawngin tlemtê hlêpin an supply ṭhin thu a sawi.

FCSCA minister John Ro­tluang­­liana chuan, tuna buhfai an supply dan kalphung chu ram leh hnam tana ṭha tur ber niin a sawi a, "Thil dik lo tih pakhatmah a awm lo," a ti.

John Rotluangliana chuan, tun hmain buhfai supply tur atan open tender an chhuah thu sawiin, "A chhang hniam ber pek loh theih an ni lo a, an buhfai supply a chhiat bakah an supply hlei thei lo a, danin a phal angin contract tihtawp a ni a, MIZOFED kutah dah a ni," a ti a; tuna an kalphung avangin sorkarin thla khatah cheng vbc. 4/5 vel a hum theih thu a sawi.