Contractor pakhat warning pek a ni

PWD minister Lal Thanzara chuan, South Vanlaiphai to Muallianpui road cell fill cement concrete hna thawktu contractor chu warning pek a nih thu House a hrilh.

INC member John Siam­kunga zawhna chhangin PWD Minister chuan, South Van­laiphai - Muallianpui kawng siamtu contractor chu ṭum sarih hna thawh zawh hun pawhsei sak a nih tawh thu a sawi a, "Hna thawh muan vangin warning pek a ni a, a thawh chak loh fo chuan a hna tihtawpsak theih a nih lohna chhan tur kei chuan ka hre lo," a ti.

John Siamkunga sawi danin, South Vanlaiphai - Muallianpui kawng siamtu contractor-in sub contract-in mi dang a pe chhâwng a, chu chuan sub-contract dang pe chhawng lehin, chu pawh chuan sub-contract-in mi dang a pe leh bawk. Kawng siam chu a chhe hle a ni.

PWD Minister sawi danin, South Vanlaiphai - Muallianpui road cell fill cement concrete atana contractor chu Zoram­chhana, Electric Veng, Aizawl a ni.

Hna hi December 21, 2013-ah thawh ṭan a ni a, agreement amount chu cheng nuai 748.56 a ni. Hna thawh zawh hun tura a tira ruahman chu June 21, 2015 a ni a, hun pawhsei hnuhnun bera zawh hun tura tih chu March 31, 2018 a ni.