Aizawlah Legal Service Camp buatsaih

Mizoram State Legal Services Authority (MSLSA) chuan nimin khan Chanmari YMA Hall-ah Legal Service Camp an buatsaih a, Gauhati High Court judge, Justice Prasanta Kumar Deka-in a hawng.

Justice Prasanta Kumar Deka chuan, legal camp chu khua leh tuite'n dikna chanvo an neihte leh sorkarin khua leh tuite tana hamṭhatna a siamte a dawng tur dik takin an dawn theih nana kawng kawhhmuhtu a nih thu a sawi a, "India khua leh tui zawng zawngin India danpui hnuaiah dikna chanvo leh sorkar laka tih tur kan nei," a ti a; dikna chanvo chauh hria a, tih ve tur lam hlamchhiah chu thil dik a ni lo tih sawiin, "Kan dikna chanvote hi mi dangte tana hnawksak zawngin kan hman a thiang lo," a ti.

Prasanta Kumar Deka chuan, India ram state tinah State Legal Services Authority a awm a, chumi hnuaiah chuan district hrang hrangah District Legal Services Authority a awm leh tih a sawi a; thingtlang leh veng hrang hrangah para legal volunteer dah niin, chu'ng mite chuan dan chungchanga puih ngaite an pui ṭhin tih a sawi bawk.

Inkhawmah hian khualzahawm, Aizawl mayor PC Lalhmingthanga pawhin thu a sawi a; Victims of Crime Compensation hnuaiah mi 14 hnenah hnenah ṭanpuina sum Rs. 38,5,4000 a sem nghal. Compensation latu zinga kum 18 la tling lote chu an bank account-ah an sum hmuh tur tam zawk dahsak a ni a, kum 18 an tlin hunah an la thei dawn a ni.

Nimina Legal Services Camp-ah hian stall 20 hawn a ni a, mipuiin dan, court leh a kaihhnawih thil hrang hranga an hriat duhte an zawtfiah a ni.