JIPMER leh Lawngtlai Hospital an thawk dun

JIPMER, Puducherry leh Lawngtlai District Hospital inkara Telemedicine Facility siam thar chu, nimin khan Lawngtlai DC Conference Hall-ah video conference hmangin hawn a ni.

Hawnna hun hi JIPMER hmunah JIPMER director Prof. SC Parija leh Lawngtlai DC Dr Arun T ten an hmanpui a; Lawngtlai lam aṭangin medical superintendent Dr Lalmalsawmi Hmar-in inkhawm a kaihruai a, JIPMER aṭangin Prof. SC Parija-a'n video conference kaltlangin a hawng a ni.

Prof. SC Parija chuan, India ram kilkhawr taka telemedicine facility hawn a nih theihna tura ngaihtuahna sengtu Lawngtlai DC leh District Hospital-a thawkte ṭhahnemngaihna ropui a tih thu leh, facility thar chu mipuitin ṭangkai taka an hman ngei a beisei thu a sawi.

Lawngtlai bawrhsap Dr Arun T pawhin, JIPMER nena telemedicine facility an din thei chu Lawngtlai district mipui tan damdawi lama rahbi thar, hriselna kawnga tihmasawntu a nih a beisei thu a sawi bawk.

JIPMER hi India rama damdawi-in lian leh damdawi lam zirna hmun lian leh hlun berte zinga mi a ni a, khawvel ram hrang hrang pasarihah telemedicine facility branch an hawng tawh a, India hmarchhakah chuan NEIGRIHMS, Shillong-ah chiah a la awm a, Lawngtlai hi a pahnihna a ni.

Telemedicine facility hmang hian mipuiin Lawngtlai District Hospital kaltlangin JIPMER-a doctor-te an ráwn thei dawn a ni.