Mizoramah Oil leh gas hmuh la beisei
Commerce & Industries minister H Rohluna chuan, MNF member Vanlalzawma leh MPC member Lalthanliana zawhna inṭâwm chhangin, Mizoramah oil emaw, gas emaw hmuh beiseina a la awm thu House a hrilh.
H Rohluna sawi danin, Mizoram chhunga oil leh gas zawn hna chhunzawm zel a ni a; Oil India Ltd. chu sorkar laipuiin July 1, 2017 aṭanga June 30, 2020 thleng Mizorama oil leh gas zawn hna thawh a phalsak leh tawh a, ONGC-in hun pawhsei an dilna erawh chu sorkar laipuiin a ngaihtuah mek a ni.
Oil India hian Thenzawl bulah leh Phulmawi bulah drilling hna an thawhna tur lei an lai záwl tawh a, Phulmawiah hmalak hmasak an tum. ONGC erawh chuan an hna thawh hun chhung a tawp hrih avangin hmalakna an nei hrih lo.