ECI-in thu a la neih loh avangin Roll revision-ah Bru paih an la ni lo
Tripura relief camp-a awm Bru, Mizoram khua leh tuite chungchangah Election Commission of India (ECI) aṭangin Mizorama Election department chuan thu thar dawn an la nei lo. ECI aṭanga thudawn a la nih loh vang hian electoral roll revision neih mekah paih an ni lo.
Tarlan tawh angin, Ministry of Home Affairs (MHA), Mizoram sorkar, Tripura sorkar leh Bru pawl hrang hrangte'n inremna an ziah angin, Tripura refugee camp-a Bru awm mekte chu Tripura-ah an awm hlen dawn a; Bru-te chu Mizoram electoral roll aṭanga paih tura tih niin, Tripura electoral roll-ah thun an ni ang.
Vanglaini palai zawhna chhangin Election department hotute chuan, electoral roll aṭanga Bru-te paih turin ECI aṭangin thu an la dawn loh avangin hmalakna an la neih loh thu an sawi a, "ECI aṭanga instruction kan hmuh hma chuan keimahni thu chuan hmalak theih a ni lo," an ti.
Tunlai hian electoral roll revision neih mek a ni a, ECI aṭanga thudawn a nih loh avangin roll revision-ah hian Tripura-a awm hlen tur Bru-te chu delete an ni lo. Roll revision hi February 7-ah zawh tur a ni.
Roll aṬanga delete theih dan :
• Normal Procedure : Mi an insawn dawn tih avanga suo moto deletion hi tih theih a ni lo (ECI instruction 2013, 2015, 2018, 2019). India ram pum hi software/network in kan inthlunzawm vek a, chu chu ERO Net tih a ni. Bru ho hian Tripura-a an awmna ERO ah transfer/luh dilna application an submit a, Tripura ERO in a lo process chiah khan automatic-in ERONET-ah Mizorama software/network-ah khan form 7 hmangin deletion request a rawn thawn ang a, chuan Mizoram-a ERO changtu in a lo delete ang.
• Sorkar-te nen an inremna angin ECI hian 'Tripura-a pem lut turte hi a hlawmin Tripura sorkarah thawn u la, delete rawh u' an ti a nih chuan.