Silai neite tuntir vek tur em ni Tih ka ngaihtuah - CM Hawla

Environment, Forest & Climate Change (EFCC) department changtu chief minister Lal Thanhawla chuan, silai nei zawng zawngte tuntir vek tur em ni tih a ngaihtuah thu sawiin, "Silai licence hi kan pe chhuak tawh mang lo a, silai tamna hmunte hi entawn tlak an ni lo," a ti a; miin EFCC department-a silai an tun bote chu uiawm tak a nih loh thu a sawi.

MNF member Lalruatkima zawhna kal zelah Chief Minister chuan, nungcha humhalh lama harh thar an awm zel laiin, ram vâk an la awm reng thu sawiin, "Sorkarin a khap chung pawhin bazarah ramsa lei tur a awm reng a ni. Silai nei zawng zawngte hi an awmna aṭanga police station hnai berah tuntir mai ka ngaihtuah," a ti a; nungcha humhalh chu thil ṭul tak a nih thu a sawi.

Lalruatkima'n nungcha humhalh duhte'n EFCC department-a silai an tunte a bo ṭhin thu a sawi chungchangah CM Hawla chuan, "A lo bo a nih pawhin a âwm lohna ka hre lo. Police custody-a mi thahna hmanrua pawh a bo thei a nih chuan police custody mi ni lo leh nghal chu a bo ve maiah ka ngai. A tam ber kha UT silai, dan phal loa siam a ni a, a bo pawh kha a uiawm lo," a ti.

Lal Thanhawla chuan, nungcha humhalh duhte'n silai an tun chu dan loa siam a nih avangin tung lo se, man theih an nih zawk thu sawiin, "Dan loa siam a ni a, tihchhiat theih a ni," a ti a; silai tungtute chu an duh thua tung an nih avangin lawmman pek an nih loh thu a sawi.

Chief Minister sawi danin, nungcha humhalh duh vanga silai tung tawh zat chu 248 a ni. Silai tun tawhte chu licence nena tun tlemte an ni a, division ṭheuah kawl ṭhat a ni. Hetih lai hian, Lalruatkima chuan, nimin chawhma lama DCF (Wildlife) a enfiahnaah silai tun chu 10 vel chiah a awm thu a sawi thung.

Mizorama silai tung hmasa ber James Dokhuma silai a bo chungchangah Chief Minister chuan, "Engtik lai emaw khan a lo bo a, sorkarin a ngaihna a hre lo. Mahse, amah zahna lantirna atan silai dang dah a ni," a ti.