NHRC-in Zophaia thil thleng chungchang NHRC-a sawifiah turin DGP-te a hriattir
National Human Rights Commission (NHRC) chuan nimin khan thuchhuah a siam a; Mizoram leh Assam Director General of Police (DGP)-te chu Bairabi Zophaia Assam police-in chanchinbumite kut an thlak chungchangah NHRC-ah report thehlut turin a hriattir.
NHRC tarlan danin, kumin March 8 leh 10-a Bairabi Zophaia buaina chhuak chungchang leh Assam police-te'n Mizoram chanchinbumite kut an thlak thu report an dawng a; chuvang chuan, Mizoram leh Assam DGP-te chu thil thlen dan kimchang takin NHRC hnenah hriattirna pek aṭanga chawlhkar li chhungin report thehlut turin a hriattir a ni.
NHRC chuan, Zophaia thil thlengah report la tura kal chanchinbumite police-te'n kut an thlak bakah, silai hmeh puah a nih thu an dawng tih an tarlang a; "Chanchinbumite'n an nihna tichiang turin police-te hnenah press identity card an hmuhtir chungin kut an thlak lui a, chanchinbumi eng emaw zat, hmeichhiate pawh telin an vua a, hliam an tawrh phah a ni," an ti.
NHRC chuan, Mizoram chanchinbumite kut thlak an nih chungchangah Mizoram Journalists’ Association (MJA)-in Aizawl Press Club-ah General Body Meeting an neih thu leh, March 13, 2018-ah Aizawlah sit-in demonstration an huaihawt thu an tarlang bawk.