Sorkarin MLPC Act hlawh-tlingin a hria - Excise & Narcotics Minister

Excise & Narcotics minister R Lalzirliana chuan, MNF member pahnih Vanlalzawma leh Lalruatkima te zawhna inṭâwm chhángin, MLPC Act chu Mizoram sorkarin a hlawhtlinga a hriat thu House a hrilh.

Sorkarin MLPC Act a hlawhtlinna sorkarin a hriat leh hriat loh zawhna chhangin Excise Minister-in sorkarin MLPC Act hlawhtlinga a hriatna chhan a tarlang a, chungte chu - tun hmaa zu aṭanga sum lut ngai lo sum tam tak sorkarah a luh phah, zu in mite'n zu thianghlim leh ṭha man tláwm zawkin an hmuh phah, state dang leh ram dang aṭanga zu quality chhe tak tak a rûka lak luh a tàwp phah, Krismas leh kumthar laiin zu khap bur lai aiin khawtlang a muanawm, MLPC Act-ah control tih a tel avangin khawlaia zu rui hmuh tur an tlem, zu rûi chunga motor khalh leh motor accident a tlem phah tihte a ni.

R Lalzirliana chuan, State Prohibition Council-te chu MLPC Act-in economic leh social lama a nghawng te, hriselna lama a nghawngte leh MLPC Act kalpui a nih dan en lêt turtea din a nih thu a tarlang a, "State Prohibition Council hnuaia Study Group-te'n an report March 5, 2018-ah an thehlut. An report hi zir chian mek a ni," a ti.

MLPC Act tihtawp emaw, siamṭhat emaw tum a nih leh nih loh zawhna chhangin R Lalzirliana chuan, Study Camp din a ni a, an zir chianna aṭanga ngaihdan la siam tur a nih thu House a hrilh.