MZP-in sit-in demonstration an huaihawt Zophaiah Zofate chawlhbûk sak ngei an tum

MZP chuan Bairabi Zophaiah Assam police-te'n MZP-te leh Mizo chanchinbu mite kut an thlak duhna leh ramri chungchanga sorkar hmalakna duhkhawp lohna lantir nan nimin khan Vanapa Hall kawtah sit-in demonstration an huaihawt.

MZP president L Ramdinliana Renthlei chuan, Bairabi Zophai chungchanga MZP chu an dinna ngaiah an din reng thu leh chawlhbuk sak ngei an tum thu a sawi.

MZP President chuan, Bengal Eastern Frontier Regulation, 1875 chu British leh Lushai territory inkara international boundary a ni tih sawiin, "Ramri-ah hian Bengal Eastern Frontier Regulation, 1875 kha kan innghahna leh kan rin ber a ni a, hei hi kan ramri-ah kan pawm a, neih let leh theih nan a ṭul ang zelin hma kan la dawn. Ramri chungchanga inbiaknaah pawh 1875 ramri hi nei let tura ṭang tlat turin sorkar thuneitute kan ngen a ni," a ti.

Inner Line Forest reserve area square mile 509 chu Mizoram chin a ni tih sawiin L Ramdinliana chuan, chumi neih let duh tawh lo anga mi ṭhenkhatin an sawi chu ṭha lo an tih thu sawiin, "Hetiang ngaihdan hi Mizote zingah awm tawh lo se kan duh khawp mai," a ti a; Mizoramin a neih let hunah a enkawl dan tur chu ram neitute'n an rel ve tawh mai tur thu a sawi.

March 20, 2018-a New Delhi-a Mizoram leh Assam Chief Secretary-te inbiakna chungchang sawiin MZP President chuan, inbiakna chuan an beisei a pha lo hle tih sawiin, Zophai tih chu Kachurtal tia an thlak chu ná an tih thu a sawi a, "Inbiakna tur kal zelah pawh hian rin ngam harsa kan ti tawh hle. India sorkar hian Mizote tana ṭha tur hian ro a rel kan ring lo a ni," a ti.

March 1, 1966-ah Mizote'n mah­nia ro inrel duhin independent an sual chu Mizo ṭhalaite'n an la theihnghilh lo tih sawiin L Ramdinliana chuan, "Kan ram humhim nan leh chhan nan chuan nunna chàn hi Mizo ṭhalaiten kan huam a ni," a ti a; kum 1966 dinhmuna din leh chu Mizo ṭhalaite'n an ngam a ni tih India sorkarin hria se an duh thu a sawi.

MZP President hian kumin March 8 leh 10-a Zophaia chawlhbûk sak an tumnaa Assam police nen an innawr chungchangah, "MZP lamin Assam police kut kan tuara kan hliam kha a tuar âwm tak kan ni a, kan chanchinbu mite thlenga Assam police-in kut an thlak a, hliam an tuar hi kan dem tak zet a ni," a ti.

Nimina MZP sit-in demonstration-ah hian MZP adviser VL Krosshneh­zova leh Lalhruaitluanga Chawngte te pawhin thu an sawi a ni.