Governor-in CADC sorkar a ṭhiat

Governor Lt.Gen. Nirbhay Sharma chuan Chakma Autonomous District Council (LADC) sorkar chu a buai avangin dan pangngaia kal thei tawh loah a ngai a, nimin khan ṭhiat a; CADC chhunga rorelna kengkawhtu (Administrator) atan Lawngtlai DC Dr Arun T a ruat.

CADC sorkar ṭhiah chungchangah hian District Council & Mi­no­rity Affairs secre­tary Rodney L Ralte-in nimin khan notification a tichhuak a; CADC sorkar chu 6th. Schedule-in thuneihna a pek anga rorel thei tawh loa ngaih a nih avangin, Governor thu angin ṭhiah a nih thu leh, District Administration enkawl rih tura dah a nih thu a tarlang a ni.

Notification-ah hian, CADC sorkar a kal mu­mal theih loh thu dawn a nih avangin, a dinhmun chhui chiang tur leh report thehlut turin Commission din a ni a, Lawngtlai DC chu chhui tura tih a ni. Commission report chuan, CADC sorkarah CADC (Constitution, Conduct of Business) Rules, 2002 nasa taka palzût a nih thu te, Indian Constitution-a 6th. Schedule-in thuneihna a pek ang takin rorelna kalpui theih a nih loh thute a tarlang.

Commission report zûlzui leh Governor thu angin CADC sorkar chu nimin khan ṭhiah a ni ta a; Lawngtlai DC chu enkawl zuitu (Administrator) atan ruat nghal a ni. Administrator hian thla li emaw, CADC inthlan hnua sorkar thar a din leh thleng emaw a enkawl ang.

CADC sorkar ṭhiah tak hi dan pangngai ang chuan, kumin April 21-a tàwp tur a ni a; chutih laiin, inthlan hun tur erawh hriat a la ni lo a, State Election Commission-in CADC inthlan hun tur a la puang lo a ni.

CADC hi July 4, 2017 khan ṭhiah a lo ni tawh a, hemi chungchanga hriattirna (notification) chu Governor thutlukna angin District Council & Minority Affairs secretary Rodney L Ralte-in July 4 khan a ti chhuak a ni.