KHAWTHLIR

Foreigner sawiho
Ram chhunga dân loa Bangladesh mi an pêm luh chungchanga a ṭul anga hma la tura Mizoram sorkarin a din, Sub-division Level Special Task Force in Connection with Illegal Bangladeshi Migrants chu March 21, Nilaini khan Tlabung SDO (Civil) V Lalmuanpuii hoin a pisaah an ṭhukhawm. Sub-division level hnuaia awm tur Village Level Special Task Force din chungchang an sawiho a, kumin April thla chawhma chhung ngeia report thehluh hman a ngaih thu an sawi a ni.

Damdawi hmang sual thi zat
Excise & Narcotics minister R Lalzirliana chuan MNF member Dr K Beichhua zawhna chhangin, kum 2013 aṭanga March 5, 2018 thlengin Excise & Narcotics department chhinchhiah danin, damdawi hman sual vangin mi 232-in nunna an chàn thu House a hrilh.

Entertainment tax
Taxtion minister Lalsawta chuan INC member TT Zothansanga zawhna chhangin, kum hnih - 2016-17 leh 2017-18 chhungin entertainment tax-ah cheng nuai 387.6 hmuh a nih thu House a hrilh a, "A tlangpuiin entertainment tax hi cable TV aṭangin hmuh a ni a, exhibition, dramatic/music perfomance, cinematographic emaw video show, etc. aṭang pawhin a lut a ni," a ti.

Cultural exchange
Nimin aṭang khan Aizawl West College-ah 'Cultural Exchange Programme' hman ṭan a ni a, March 28 thleng a awh ang. Programme hmang tur hian Alva's Education Trust, Karnataka aṭangin zirlai 10 leh zirtirtu pakhat an rawn kal a; programme-in a tum ber chu, zirlaite leh a khaw mite nena thawhho a ni.

Hmalak dan tur sawiho
Lunglei District Anti-Tobacco Squad chu nimin khan DC Lalzarmawii hoin a pisa-ah an ṭhukhawm a, hmalak dan tur an sawiho. Meeting-a tarlan a nih danin, anti tobacco squad-te hian April 2017 aṭanga February 2018 chhung khan mi 269 hnenah counselling pe in, squad drive ṭum 43 an nei a ni.