CM chhui tur committee din turin BJP-in Governor an ngen dawn

Mizoram BJP general secretary Vanlal­hmuaka chuan nimin khan an pisaah thuthar thehdarhtute a kâwm a; chief minister Lal Thanhawla chhui tura inedependent inquiry committee din turin Governor hnenah ngenna thlen an tum thu a sawi.

Vanlalhmuaka chuan, Mizoram hmun hrang hrangah kawng a chhiat thu sawiin, "Kawng a chhia a, sum hmuh a tlem phah chuang si lo. Mizoramah hmasawnna hnathawh hmuh tur a tlem hle a, sorkar laipui aṭangin sum kan dawng reng tho si. Chuvang­in, hlemhletnaah hian Chief Minister hi a inrawlh ngeiah kan ngai," a ti.

BJP General Secretary chuan, central aṭanga an hotu lo kalte nen Mizoram dinhmun an zir chian hnuah, Mizoramah hlemhletna a awm ngei tih an hmuhchhuah avangin, Chief Minister chu chhui chiang turin Governor hnenah an thlen dawn thu a sawi a ni.

Ramri buai chungchangah sorkar laipui a inrawlh vat avanga lawmawm an tih thu sawiin Vanlalhmuaka chuan, "Hetiang hian eng sorkar mah an inrawlh vat ngai lo. Hei hian BJP sorkar hian buaina duh loin, remna leh muanna an duh tih a tilang chiang hle. Mizo mipuite thlamuang taka awm turin kan duh a ni," a ti.

Vanlalhmuaka chuan Mizoram sorkarin tun hnai khan CADC tan cheng vbc. 10.20 a release thu sawiin, "Heng sumte hi CADC sorkar chuan la chhuak nghalin, bank-ah pawh dah loin an kawl a ni. He sum hmanna tura an ruahmante chu hnathawhna tawh sate a ni hlawm. He sum hi tlemte hnathawhna atana hman a, CADC inthlan atan hman an tum a ni," a ti a, hemi chungchang chhui tur hian Governor hnenah ngenna thlen an tum thu a sawi.