World Water Day hman a ni

Nimin kha World Water Day a ni a, Aizawl leh district dang ṭhenkhatahte PHE department huaihawtin hman a ni. Aizawlah chuan Lal Thanhawla Auditorium-ah hman a ni a, Planning Board vice chairman H Liansailova khuallian a ni.

H Liansailova chuan, khawvel siamtu Pathianin thil nung tinrengte inchâwm tawn a, nunna atana inring tawn tura a siam thu sawiin, "A thil siamte enkawl tura mihring a dahte hi a tibawrhbángtuah kan ṭang fo ṭhin. Pathianin mawhphurhna min pek kan hlen chhuah loh avangin keimahni ngei pawhin kan tuar dawn a ni," a ti.

Tui mamawhna a sang zel tih sawiin H Liansailova chuan, "Lo leh thlai thar nan mai bakah, hmasawnna kawng tinrengah tui kan mamawh a, kan nunna atana pawimawh tui humhalh turin kan harh chhuah a ngai a ni," a ti a; tuihna humhalh mai bakah, nungchate leh thing leh maute humhalh turin sorkar chauh ni lo, mi zawng zawngin mawhphurhna an neih thu a sawi.

Inkhawm hi PHE secretary KT Beichho-a'n a kaihruai a, Central YMA president Vanlalruata leh Mizoram University-a zirtirtu Dr Lalnuntluanga-te pawhin tuihna humhalh ṭulzia leh mi tin mawhphurhna a nihzia an sawi.

Serchhipah chuan PHE Ser­chhip WATSAN Division huaihawtin PHE pisaah hman a ni a, PHE executive engineer F Lalsanglura'n a hmanpui. F lalsanglura hian PHE Serchhip WATSAN Division-in World Water Day puala booklet an siam, 'Kan tui, kan nunna' (Our water, our Life) tih chu a tlangzarh a ni.

Kum 1992-a United Nations Conference on Environment and Development (UNCED)-in World Water Day hman a rawt angin March 22, 1993-a United Nations General Assembly chuan March 22 chu World Water Day atan a puang.

World Water Day-ah hian tui thiang­hlim leh tui in tlak pawimawhna hre chiang deuh deuh tur leh, tui thianghlim in tlak tla­chham loa a awm theih nana hma thar la zel turin UN General Assembly chuan mi zawng zawng a beisei a ni.