NLUP hi mipui rawkna rapthlak ber a ni - MNYF

MNF ṭhalai chuan thuchhuah siamin, March 21, Nilainia Assembly session-a minister KS Thanga demand pass pui duh loa eptu MLA-te House aṭanga an chhuah chhan chu âwm an tih thu leh an thlâwp thu an tarlang a, "NLUP hi mipui rawkna rapthlak ber a ni," an ti.

MNYF chuan, Congress sorkarin NLUP an kalpuiah, a tir aṭanga tun thlengin a dawngtu tur chu Congress unit hruaitute'n an thlang a, hmun tam zawkah Congress member chauh thlan an nih thu sawiin, Congress aṭanga party danga inlette chu NLUP dawng tura an thlan sa pawh ni se, an paih zel ṭhin niin an tarlang.

NLUP Apex Board-in NLUP dawngtu tur mi 400 ṭheuh lo thlang chhuak turin Congress MLA 34-te an hriattir a, eptu MLA-te an hriattir ve lo chu thinurthlak an tih thu sawiin MNYF chuan, "Heti khawpa sorkarin mipui thlan tlinte a thliar hi ná kan ti tak zet. Zoram mipui sum NLUP Congress party invulhna atan chauha an hmang zel hi Zoram mipuite rawkna rapthlak tàwpkhâwkah kan ngai," an ti.

MNF ṭhalaite chuan, Congress party sorkar chhunga Assembly session hrang hrangah ruling MLA-te'n eptu MLA-te chu an legislator pui an ni lo emaw tih tur khawpin tham lo takin an ṭawng khum ṭhin nia sawiin, ṭha lo an tih thu an sawi a; mipuiteah ram hruaitute zahlohna leh ngaihnêpna thlen thei a nih avangin chíng tawh lo turin Congress MLA-te an chah a ni.