Gas harsatna kan hria - FCSCA Minister
Food, Civil Supply & Consumer Affairs (FCSCA) minister John Rotluangliana chuan, INC member TT Zothansanga zawhna chhangin Mizoram puma gas harsatna sorkarin an hriat thu a sawi.
John Rotluangliana chuan, Indian Oil Corporation (IOC)-in carrying contractor a chhawr hniam lutuk avangin gas an phur ṭhat duh loh thu a sawi a, "Sorkar pawhin a buaipui hle. IOC lam thuneihna a nih avangin kan bàn ngawt thei si lo a, nasa takin kan nawr a ni. An contract hi Sepetember-ah hian a tawp dawn a, pawtsei tawh lo turin IOC kan ngen a, an pawhsei tawh dawn lo a, April hian tender chhuah an tum a ni," a ti.
FCSCA Minister chuan, gas hnianghnâr zawka hmuh a nih theihna atan contractor-te sum pek belh atan Finance department-ah sum an dil a, cheng vbc. 8 pek an nih dawn thu sawiin, "Gas phurh chungchang bakah hian Mualkhang Gas Bottling Plant hi a tê lutuk a, metric ton 100 chiah a leng a ni," a ti a; Sairang ramah metric ton 500 awm theihna tur bottling plant IOC-in bun an tum thu a sawi.
Hmun hrang hrang aṭangin gas agency hawn belh tura nawrna an dawn nasat thu sawiin John Rotluangliana chuan, "Gas agency hawn belh hi kan thuneihna a ni lo a, IOC lam kan nawr ve reng. Theihtawp kan chhuah ve reng a ni," a ti.