Serlui Bialtu MLA-in tuizém a sem

Serlui bialtu MLA Lalrinsanga Ralte, Rubber & Allied Crops Development Board vice chairman chuan nimin zing khan a bial chhung khaw hrang hranga sem turin plastic tuizém (Sintex) 185 chu Bilkhawthlir aṭangin a vailiam. Tuizemte hi litre 1,000 dawng a ni a, MLA fund aṭanga lei a ni.

Tuizem semna inkhawmah hian Lalrinsanga Ralte chuan Bilkhawthlir khuain kum 2021-a YMA General Conference-a thlenna tura inbuatsaihna leh mamawha hman turin laptop leh printer pakhat ve ve YMA General Conference Organising Committee hnenah a pe a; Bilkhawthlir Games & Sports hnenah basketball scoreboard leh ring a hlan nghal bawk.

Serlui bialtu MLA chuan, tuizem sem a nih chhan chu a bial chhunga mi harsa zawkte'n tui thianghlim leh hrisel zawk an dah khâwl theih nan leh ṭhál laia tui harsat zualpui a phuhrûk theih nan a nih thu a sawi.

A MLA fund chu chhungkaw tin thleng zo ni se a duh thu sawiin Lalrinsanga chuan, "Kan mamawh leh a ṭul dan azir zelin MLA fund hi hmeithai, rethei leh kuthnathawktute tan a tam thei ang ber kan tum. Mipui sorkar, mipui ta kan nih angin party-ah kan buai ve dawn lo. Mi harsa leh dâwm kân ngai, khawtlang pawhin àwm an tih chu party dang pawh ni se, kan thlahthlam lo ang. Mi harsa leh rethei, kut hnathawktute chhawmdawla khaichhuah hi kan tum ber a ni," a ti.

Lalrinsanga Ralte chuan, chief minister Zoramthanga chu Pathian ráwn chung leh a duh dana ram kaihruaitu a nia sawiin, "Zoramthanga kan neih avangin kan ramin malsawmna a dawng mek a ni," a ti a; kumina village council inthlan awm turah ruling V/C neih a pawimawh thu sawiin, "Party rilru dahṭhain, ruling VC kan neih hian development a kal chak zual a rinawm," a ti bawk.