Boundary Committee an ṭhukhawm 1875 kan dinna a la ni reng - Dy CM

Dy Chief Minister chuan, Mizoram leh Assam siam felna atan Mizoram sorkar chu a dinna ngai ‘Inner Line of 1875’ ah a la ding reng tih sawiin, "Mizoram-Assam ramria police-te pawh rinawm leh inpe takin an duty reng a, Mizoram mipui tan a thlamuanthlak hle a ni," a ti.

Ṭhutkhawm hmasaa thurelte lo bawhzui tura tih Chief Secretary kaihhruai sub-committee chuan hripui léng avangin an tih tur ang an tih lawk theih loh thu sawiin Tawnluia chuan, "Quarantine leh thil dang avangtein hma an la chak thei lo a, duh angin committee kan ko hlei thei lo," a ti a, a ṭul tawh em avangin commi­ttee chu chawpchilh deuha koh a nih thu a sawi.

Committee chu sorkarin hma a lak dan tur chhawp chhuaktu tur an nih thu sawiin Dy CM chuan, "Pawr deuha ramri chungchang report-te a awm a, a hnuah a ni leh lo tihte a awm ṭhin. Kan thil ngaihtuah hi a sensitive si a, political party leh pawl aiawhte pawh kal ngaia kal hram hram tum ang u. Hman loh cháng chu a awm lo thei lo," a ti.

Meeting-ah hian chief secretary Lalnunmawia Chuau­ngo chuan thurel tura chhawp chhuahte a sawi zau a, IGP (HQ) John Neihlaia chuan ramria police awmte dinhmun a tarlang a; July 30, 2021-a ṭhutkhawm hmasaka hmachhawpte uluk taka thlirho a ni.

Committee hnuaiah sub-group a awm a, chutah chuan kum 2018-a Joint Action Commi­ttee-in Prime Minister hnena memorandum a thehluh tawh chu uluk leh chik lehzualin a zir a, chumi aṭanga rawtna leh ngaih­tuahho tur agenda hrang hrang chhawpchhuahte sawiho a ni.

Dy Chief Minister chuan, sub-group-in discussion paper a siam chu zir chiang tur leh committee ṭhutkhawm lehah anmahni páwl ṭheuh ngaihdan pharh turin political party leh pawl dangte a ngen.

Boundary Committee-ah hian Home minister Lalchamliana, Supply minister K Lalrinliana, IPR minister Lalruatkima, Law & Judicial minister TJ Lalnun­tluanga, NGO aiawh, JAC on Inner Line Reserved Forest Demand aiawh, political party aiawh, MZU leh college-a thawkte leh sorkar hnathawk pension tawhte an tel a ni.