Vairengte Aitlanga kawng laitu Assam police-te'n kut an thlâk

Assam police-te chuan nimin chawhnu dar 1:30 vel khan Vairengte khaw chhung aṭanga Aitlang hmuna Mizoram police-te duty-na hmun panna tur kawng laitu JCB operator Mizo pakhat chu kut an thlak a, JCB chahbi leh a mobile phone an chhuhsak bawk.

Vairengte aṭanga thu dawn danin, JCB hmangin hmun hrang hrangah kawng laih a ni a; nimina Assam police-in kut an thlak tâk hi a fál deuh hleka awm a ni. A hnathawhna hmunah Assam police 50 vel kalin, an ben bakah a kawr an pawh thlèrsak a ni.

JCB operator hi puih a ngaih thuin a au chhuak a, hna thawk dangte chu thil thlenna hmunah an kal nghal a, an thlen chuan Assam police-te chu an lo awm tawh lo. Thil thleng hriat a nih veleh Mizoram police leh Vairengte khaw mite chu thil thlenna hmunah an kal nghal bawk. He thu ziah lai thleng hian Assam police-te'n JCB chahbi leh mobile phone an la pe let lo.

Mizoram leh Assam sorkar chuan Aitlang hmuna an police-te awmna pawh turin kawng an lài ve ve a; state pahnih police-te awmna hmun hi a inhlat vak lo nia thu dawn a ni.