Sports Incentive Cash Award sem a ni ; Infiamna hmun din zel kan tum - CM

Mizoram sorkar chuan nimin khan Aijal Club-ah Sports Incentive Cash Award an sem. Khuallian chief minister Zoramthanga chuan, ṭhalaite tan infiamna hmunhma din zel an tum thu a sawi.

Chief Minister chuan, a kaih­hruai sorkar chu hripui lên laia sports infrastructure siam nasa lutuk tia sawisel a nia sawiin, "Heng pawisate hi thil dang atana hman theih a ni lo. A hmanna tur awm sain sanction a lo kal a, a dangah a hman theih miah lo. State sorkarin a theih leh tlin chin bakah central-ahte project siamin, ṭhangtharte tan theihtawp kan chhuah zel dawn," a ti.

Sports minister Robert Romawia Royte fakin Zoramthanga chuan, "Hma a la nasa a, a lawmawm, tih zel pawh kan tum. Sports minister ka thlâk dawn a, CM-in lak a tum, ti ila in lawm vak lo ang. Chutiang khawp chuan kan duh a, ṭha kan ti em em a ni," a ti a; infiamna lama hmasawnna atan Covid-19 léng karah an beih thu a sawi.

Chief Minister chuan, ṭhalaite'n intihsiakna tur hmun an la neih lohte neih a nih theih nan nasa takin hma an la nia sawiin, "Racing course-te pawh kan ngaihtuah. Chumi atan chuan Tuirial Airfield chei ṭhat kan tum. Páwn lam aṭanga funding kan hmu lo a nih pawhin, state fund aṭangin a theih chin chin tih kan tum," a ti.

Infiamna chu ram hlimthla atan a pawimawh thu sawiin Zoram­thanga chuan, "Infiamna pawimawhna em em chu mimal nun a siam ṭha a ni. Hriselna kawnga uluk taka inenkawl loh chuan a hlawhtlin theih loh," a ti a; mipuiin taksa insawizawi uar se, Mizoramin hmasawnna ropui tak a neih tur thu a sawi a ni.

Khualzahawm Lalrinliana Sailo, Assembly speaker chuan, kum 2024-a Paris Olympics-ah Mizo infiammi a tam thei ang ber tel thei se a duh thu sawiin, "Discipline hrang hrang association-te'n chona atan hmang se. Kum 2024 hian medalist nei turin i ṭang u," a ti a; kumina Olympics-ah Mizoram aṭanga tel an awm chu lawmawm a tih thu a sawi.

Award sem inkhawm hi Sports & Youth Services secretary H Laleng­mawia'n a kaihruai a, SYS minister Robert Romawia Royte pawhin thu a sawi. Award hi infiammi 2,005 hnenah pek a ni a, cheng nuai 120 sem ral a ni.