Covid-19 vei hmuh thar leh enkawl mek tam lamah Mizoram parukna

India rama state leh union territory 36 zingah Mizoram chu Septem­ber 1, Nilainia Covid-19 vei hmuh chhuah tam lamah parukna a ni a, hripui vei enkawl mek (active case) tam lamah parukna a nih bakah, active case percentage-ah a sang ber.

September 1, 2021 khan Mizoramah Covid-19 positive 1,111 hmuh chhuah a ni a, Mizoram aia hmuh thar tamna state panga a awm a; chu'ngte chu - Kerala (mi 32,803), Maharashtra (4,456), Tamil Nadu (1,509), Andhra Pradesh (1,186) leh Karnataka (1,159)-te a ni. Hmarchhak state pariat zingah Mizoram chu hripui vei hmuh chhuah thar tam berna a ni leh a, a záwnin ni 10 chhung hmuh chhuah tam berna a ni tawh.

Nimin chawhma lam dinhmun angin, Mizoram chu India rama state 28 leh UT pariat zingah Covid-19 vei enkawl mek tam lamah parukna a ni a, state 22 leh UT pariatte chu Mizoram aia hripui vei enkawl lai tlem zawkna vek a ni.

Mizorama active case zat chu 9,865 a ni a, Mizoram aia active case tamna state-te chu - Kerala (2,30,461), Maharashtra (54,606), Karnataka (18,438), Tamil Nadu (16,620) leh Andhra Pradesh (14,473)-te an ni. India rama active case zat 3,89,583 zinga a zatve aia tam, 59.16% chu Kerala state-ah hian an awm.

Active case tam lamah Mizoram hi India ramah parukna a nih laiin, hripui vei hmuh chhuah tawh aṭanga enkawl mek zat san lam (percentage)-ah chuan India ramah pakhatna a ni mek a, pakhatna ni satliah loin, a sáng fál hle. Nimin chawhma lama Mizorama active case chu 16.14% a ni a, Mizoram hnaih bertu chu Kerala niin, 5.63% a ni.

Hetih lai hian, Mizoram hi Covid-19 vanga thi zatah erawh chuan India ramah dinhmun ṭha ber zinga mi a ni thung. Nimin chawhma lam thlengin Mizoramah mi 218 an thi tawh a, state zingah thi tlemna ber a nih bakah, UT zingah pawh Mizoram aia thi tlemna pathum - Dadra and Nagar Haveli and Daman and Diu (4), Lakshadweep (51) leh Ladakh (207)-te chiah an awm.

Covid-19 positive hmuh tawh aṭanga thi zat san lam (death rate)-ah chuan Mizoram hi dinhmun ṭha ber dawttu a ni a; Mizorama thi zat percentage chu 0.36% a nih laiin, Mizoram aia death rate hniamna awmchhun DNHDD-ah chuan 0.04% chauh a ni.