KHAWTHLIR

Sample endik rûnpui
September 1, Nilaini khan Bawngkawn venga hmun pasarihah Rapid Antigen test hmangin swab sample endik rûnpui neih a ni a, mi 2,668 endik aṭangin Covid-19 vei mi 157 hmuh chhuah a ni. Khawzawlah pawh nimin khan sample endik rûnpui neih a ni a, tlai dar 4 thlenga sample 543 endik tawhah hripui vei hmuh chhuah an awm lo. Khawzawla sample endik rûnpui neihna hmunte chu district bawrhsap CC Lalchhuangkima'n a tlawh kual a; veng hrang hranga Covid-19 kaihhnawiha duty-te pawh tlawh nghalin, task force-te hnenah Rs. 2,000 ṭheuh a pe.

Thisen pe
Johnson College-a National Service Scheme (NSS) volunteer-te chuan nimin khan Civil Hospital, Aizawl blood bank-ah thisen unit 25 an pe a, petute mipa 21 leh hmeichhia pali an ni.

Sangha notê sem
Fisheries department chuan nimin khan Lawngtlai circle huam chhunga sangha dil neitute hnenah SEDP hnuaiah sangha notê 1,00,000 an sem. Sangha no an sem hi common carp, mrigal leh grass carp a ni a, sorkarin 70% tumin, a dawngtute'n 30% an tum ve thung. Chawngte circle leh Sangau circle-ah Sangha no 1,00,000 ve ve sem leh tura ruahman a ni. Lawngtlai District Fisheries Development office chuan an district-a sangha dil siamtute tan SEDP aṭangin sangha chi nuai thum an dawng a ni.

Hripui vangin mi pakhat thi
Nimin khan Covid-19 vei enkawl lai mi pakhat a thi a; sorkar chhinchhiah angin, nimin tlai dar 5 thleng khan hripui vangin mi 219 an thi tawh. Covid-19 vanga nimina thi chu F Zairema (87) h/o Lalthangliani, Republic Veng a ni a, chhun dar 11:45 khan State Referral Hospital-ah a thi. Thu dawn danin, F Zairema hi zunthlum, lung ṭha lo leh natna dang nei sa a ni a, Covid-19 vaccine la kim tawh a ni. Covid-19 positive a ni tih August 24 khan hmuh chhuah a ni a, SRH-ZMC-ah dah luh nghal a ni.