IAS coaching kal zote fuihna hun hmang

Nimin khan Planning & Programme Implementation department conference hall-a Mizoram Youth Commission (MYC) hnuaia New Delhi-a IAS coaching kal mi 20-te fuihna hun hman a ni a, deputy chief minister Tawnluia'n a hmanpui.

UPSC preliminary exam atana MYC-in a thlawna coaching a kaltir mi 20-te fuihna inkhawm hi MYC chairman Dr Vanlalṭanpuia, MLA-in a kaihruai a; Tawnluia chuan, UPSC exam-ah hun rei tak chhung Mizo tling an awm loh thu sawiin, "Incho chhuah a ngai a ni. Chief minister Pu Zoramthanga hnenah thlen a ni a, ani'n a lo phûrpui a, tihhlawhtlin a ni hi a lawmawm tak zet," a ti.

Mi 20-te chu mi dang tan sûl sutu an nih a pawimawh thu sawiin Tawnluia chuan, "Taimakna leh tumruhna nen exam hmachhawn ang che u. Mizoram tana rawngbawltu nihna kawng pawimawh tak a ni a, ram tuihâlna hriaa beidawng hauh loa in ṭan a ngai," a ti a; sorkarin ṭhalaite chawikanna kawngah theihtawp a chhuah tur thu leh central service-a ṭhalaite an luh tam theihna turin zau zawk sponsorship program kalpui tum a nih thu a sawi.

Chief secretary Lalnunmawia Chuaungo pawhin thu sawiin, theihtawp chhuahnaah hlawhtlinna a awm thu a sawi a; vawi khat exam-naa UPSC paltlang chu tlemtê an nih thu sawiin, an hlawhtlin hma chu bei zel turin a chah.

Mi 20-te hi ALS Coaching Centre, Delhi leh Chanakya IAS Coaching Centre, Delhi-ah coaching kaltir an ni a, February 2021-ah Delhi-ah class an kal ṭan. Covid-19 léng avangin April 2021 laihâwl aṭangin class pangngai titawpin, online class-a chhunzawm a ni a, August 30 khan video session an zo. UPSC Civil Service Examinations (Preliminary) la hmachawn tur an ni.

MYC-in coaching kal tura a tirhna hi kalna leh hawna, awm man leh, ei leh in mante sorkarin a tumsak vek a, a zavai atana sorkarin sum a sen chu cheng nuai 50 a ni.