RAT-a innghah vangin harsatna a thleng - Congress ṭhalai

Mizoram Pradesh Youth Congress Committee (MPYCC) chuan, Covid-19 vei leh vei loh enfiahnaah Mizoram sorkar chu result dik lo pe chhuak tam ber Rapid Antigen Test (RAT)-ah a innghah avangin harsatna tam tak a thlen phah mek niin an tarang.

MPYCC chuan, sorkar laipuia Ministry of Home Affairs-in swab sample endikna atana ṭha ber RT-PCR hmangin swab sample endik zawng zawng zinga 70% tal endik tura a tih laiin Mizoramah chuan zawm a ni lo hle tih an tarlang a, "False result (result dik lo) tam ber RAT-ah kan innghat a, hei hian awmzia awm si loin harsatna tam tak min siam mek a ni," an ti.

Congress ṭhalaite tarlan danin, Ministry of Home Affairs-in March 23, 2021-a thuchhuah a siamah, April 1, 2021 aṭang chuan Covid-19 dona chak zawka a kal theih nan RT-PCR test 70% tal neih tur tih a ni a; RT-PCR test tlemna state leh union territory-te chu rang taka zâwm tura tih a ni bawk.

MPYCC chuan, "Hetiang taka RT-PCR test a pawimawh lai leh High Court hialin Lungleiah khawl tifel tura a tih hnuah Pu Zoramthanga sorkarin a ngaihthah lui hi Mizoram mipui min tham lohzia a lang. District tina RT-PCR khawl dah tura tih a nih laia a ngaihsak duh miah lo hi Mizoram mipui tan an inpek lohzia a lang a ni," an ti.