Tuirialah candidate neih kan tum - BJP President

BJP, Mizoram Pradesh president Vanlalhmuaka chuan, Tuirial biala Assembly by-election a awm hunah candidate neih ngei an tum thu a sawi.

Vanlalhmuaka hian an party zawm tharte nimina an pisaa a lawm luhnaah, Mizoramin hmasawnna tak tak a neih theih nan BJP-te'n hma an la zel nia sawiin, "Vanduaithlak takin Tuirial bialtu Pu Andrew H Thangliana a boral avangin bial ruak a ni a, BJP pawhin Tuirial biala hmasawnna a awm theihna turin hmalaka candidate neih ngei kan tum dawn a ni," a ti.

BJP President chuan, "Kum 2018 MLA inthlana MNF sorkar Central BJP-in a puihna ang kha 2023-ah chuan a awm tawh dawn lo. MNF hian min thawhpui loh thu House-ah an sawi avang khan Central chuan an rawn pui tawh dawn lo a, keimahni ke ngeia ding chhuak turin hna kan thawk dawn a ni," a ti a; kum 2023-ah MLA tam tak nei turin hma an la zel dawn tih a sawi.

Mizoram chu Covid-19 vangin a rethei zual hle tih sawiin Vanlalhmuaka chuan, "Sorkar hian mipui tan tih theih a nei miah lo hi a vanduaithlak hle. Kan sorkar hrawn mek hian an manifesto tihhlawhtlin theih loh chhuanlamah Covid an hmang duh mai thei a, nimahsela, Covid leng avang hian Mizoram sorkar hian a hun hmain sum Central aṭangin a neih phah zawk a ni," a ti.