Aizawl khawpuia veng 9-ah Restricted area puan a ṭul : DC

Aizawl DC Dr Lalhriatzuali Ralte chuan August 31, 2021 khan Health department-a Aizawl East leh West chief medical officer (CMO)-te hnenah lehkha a thawn a, Aizawla veng pakuaah Covid-19 nasa taka a lên mek avangin a rang thei ang berin veng pakuaah restricted area/containment zone puan a ṭul thu a tarlang.

Aizawl Bawrhsap hian August 19-28, 2021 inkar, ni 10 chhunga veng pakuaa Covid-19 positive hmuh chhuah zat leh an dinhmun mek a tarlang a, "Heng vengahte hian Covid-19 vei an tlahniam lo a, a rang thei ang berin restricted area/containment zone puan a ṭul a ni," a ti. Aizawl East leh West CMO-te chu veng pakuate dinhmun zir chiang tur leh a hma thei ang bera assessment report Aizawl DC hnena thehlut turin a ngen a ni.

Veng pakuate chu Red Zone tia sawi niin, Covid-19 prevalence rate chu 10% chung lam vek a ni a; Covid-19 lên nasat dan indawtin - Bethlehem Veng, Zemabawk North, Bawngkawn, Ṭhuampui, Bethlehem Vengthlang, Maubawk, Tuikual South, Zemabawk leh Ramhlun North-te a ni.

Veng pakua zingah hian Bawngkawn chu restricted area-ah puan a ni tawh a, September 1, Nilaini aṭang khan restricted area niin, pawimawh bikte lo chu chhuah phal a ni lo a, dawr zawng zawng khâr a ni.

Table-ah hian ni 10 chhung, August 19-28, 2021 chhunga Covid-19 vei hmuh chhuah zat tarlan a ni a, casual test (mass test tel loin)-ah hmuh zat a tam avang leh hripui vei enkawl mek 80 chung lam an nih avangin Red Zone-ah dah an nih thu tarlan a ni bawk.