Mizoramah 2019-ah mi 6,606 an thi ; Thi zingah mipa 1,498-in tam zawk

Kum 2019 chhung khan Mizoramah mi 6,606 an thi a, mitthi zingah hmeichhia aiin mipa an tam zawk. Hetih lai hian, kum 2019 chhung khan nau piang 23,808 an awm.

August 30, 2021-a tlangzarh tâk Statistical Handbook Mizoram 2020-a tarlan danin, kum 2019-a Mizorama thi 6,606 zinga 4,052 chu mipa an ni a, 2,554 chu hmeichhia an ni. Hmeichhia aiin mipa thi 1,498-in an tam zawk. Mitthi zinga 2,011 (30.44%) chu kum 70 chung lam an ni a, kum ṭhen hrang hrangah thi an tam ber. District zingah Aizawlah mitthi tam berin, mi 3,337 an thi a, thi tlemna ber Mamit district-ah mi 260 an thi.

Kum 2019 chhunga nau piang tamna ber pawh Aizawl district tho niin, nau piang 9,866 an awm a; nau piang tlemna ber Serchhip district-ah mi 698 an piang a ni.