Lungleiah a rang thei ang bera RT-PCR khawl bun an phût

Lunglei Ṭhalai Pawl (LṬP) chuan September 1, Nilaini khan thuchhuah siamin, Mizoram chhim lam pumpui tana ṭangkai tur Reverse Transcription Polymerase Chain Reaction (RT-PCR) kháwl a rang thei ang bera Lungleia bun a nih loh chuan an thiam danin hma an la dawn tih an puang.

LṬP chuan, "Chhim lam pumpui tana khawl ṭangkai tak ni tur hi a rang thei ang bera bun a nih loh chuan LṬP chuan a thiam danin hma a la ve mai dawn a. Sorkar emaw, mimal emaw, Lunglei mi emaw, Aizawl mi emaw pawh ni se, he kawng dâltu apiang chu eng pawh huamin a hmachhawn dawn a ni," an ti.

LṬP tarlan danin, Lungleia RT-PCR khawl dah dan tur ngaihtuah tura din Committee-in August 18, 2021-ah report a thehlut a, mahse, an report-ah chuan ziah sual a tam a, SEDP tih turah NEDP tia an ziah avangin report thehluh tawh chu hnuhkìr leh a ni.

RT-PCR khawl chung­­­chang ngaihtuaha ṭhutkhawm hmasak bera meeting attendance tihbo a ni a, a hnuah Lungleiah lâk ṭhat leh a ni. Committee-in report a siamṭhat chu August 27 khan thehluh leh tawh a ni bawk.

LṬP chuan, "He­tianga inthlahdah taka mawhphurtute an khawsa hi kan ngai thiam lo hle. An inthlahdah ngam chhanah a enkawltu Health Minister hian RT-PCR chungchang hi a ngaihven tawk lo a, tihpuitlin tumna a neih loh vang niin LṬP chuan kan ngai," an ti.