COVID-19: Mizoram dinhmun ; Hripui vei 1,111 hmuh belh a ni
September 1, Nilaini khan Mizoramah Covid-19 vei mi 1,111 hmuh chhuah a ni a, hripui vei hmuh thar tam lamah India rama state leh union territory 36 zingah parukna a ni. Nimin khan Covid-19 vei dam tawh mi 135 chhuahtir an ni a, hripui vangin mi pakhat a thi.
Covid-19 vei hmuh tharte chu mipa 527 leh hmeichhia 584 an ni a; ZMC laboratory-a hmuh chhuah 160, TrueNAT-PCR hmanga hmuh 74 leh RAT hmanga hmuh 877 an ni.
Hripui vei hmuh thar 1,111-te chu symptom nei 584 leh nei lo 527 an ni a; tualchhunga kái 1,105 leh tun hnaia state pawn aṭanga rawn lut paruk niin, tualchhunga hri kái zingah kàina chin hriat loh mi 577 an awm.
Nimin chawhma lam dinhmun angin, Mizoram chu India rama state 28 leh UT pariat zingah Covid-19 vei enkawl mek tam lamah parukna a ni a, state 22 leh UT pariatte chu Mizoram aia hripui vei enkawl lai tlem zawkna vek a ni.
September 1, Thawhlehnia sample endik dan chu - ZMC laboratory-ah 1,285, TrueNAT hmangin district 10-ah 509, RAT hmangin district 11-ah 7,215 leh FIA hmangin 43 a ni a, a vaiin sample 9,052 a ni. Sample endik aṭanga hripui vei hmuh chhuah 1,111 chu 12.28% a ni a, ZMC-ah 12.53%, TrueNAT-ah 14.54%, RAT-ah 12.15% leh FIA-ah 0% a ni.
District tinah hripui vei hmuh chhuah dan chu - Aizawlah mi 684, Lungleiah 118, Kolasib-ah 71, Champhaiah 65, Lawngtlaiah 45, Mamitah 40, Siahaah 39, Khawzawlah 28, Hnahthialah 12 leh Serchhipah pakua a ni. Aizawla veng 67 leh khaw dang 58-a mite an ni a; Lungleia veng 19, Champhai leh Lawngtlaia veng pakua ve ve leh Kolasib-a veng paruka mite an lang.
Covid-19 vei hmuh chhuah thar 1,111 zingah nausen kum khat tling lo 14 telin, a naupang ber ni sarih mi chu ZMC-a zai chhuah a ni a; hripui vei hmuh thar zinga upa ber chu kum 86 mi a ni thung.
Mizorama Covid-19 vei hmuh tawh zat 61,111 chu kum 2011 chhiarpui angin, Mizorama mi 1,000 zelah hripui vei mi 56 an awm ang a ni. Nimin khan tlai dar 5 thlengin hripui laka fihlim tawh mi 135 chhuahtir an ni a; Aizawl district-ah mi 48, Kolasib district-ah 52, Champhai district-ah 14, Mamit district-ah 13, Hnahthial district-ah paruk leh Saitual district-ah mi pahnih an chhuak.
Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a; ZMC-ah positive 13,845 hmuh chhuah a ni tawh a, TrueNAT-PCR hmangin 3,521, RAT hmangin 43,691, FIA hmangin 52 leh Guwahati-ah pakhat hmuh chhuah a ni tawh.
IDSP tarlan danin, September 1, 2021 thlengin Mizoramah swab sample 8,82,096 endik a ni tawh a, chu'ng aṭanga Covid-19 vei hmuh tawh zat 61,111 chu 6.93% a ni. Hripui vei hmuh tawh zinga mi 56,763 chu Mizoram chhunga kái chhâwng an ni a, mi 4,347 chu Mizoram páwn aṭanga an rawn luh hnua hmuh chhuah an ni.
