NLUP sum nuai 377.77 pawl 5 pûktir NLUP sum pûktute'n an rùl ṭha lo

Agriculture minister KS Thanga chuan MNF member Lalruatkima zawhna chhangin, NLUP sum pawl panga hnenah cheng nuai 377.77 pûktir a nih thu a sawi a, a pûktute'n a rulh hunah an rulh ṭhat loh thu House a hrilh.

NLUP sum pûk danah guidelines siam a nih thu sawiin Agriculture Minister chuan, "Pawl panga sum pûktirah hian a pung a awm lo. A rulh hun tur siam a ni a, an rûl ṭha lo. NLUP sum aṭang hian benificiary-te hnena pek ni lo administrative cost leh thil dangah cheng vbc. 118.83 hman a ni tawh," a ti.

Lalruatkima'n January 29, 2016-ah mimal hnenah NLUP sum cheng nuai 165 pek a nih thu a sawi chungchangah KS Thanga chuan, Labour, Employment and Industrial Training (LEIT) department hnenah pûktir a nih thu a sawi.

LEIT department hnena pûktir ni si, mimal bank account-a dah a nih chhan zawhna chhangin Agriculture Minister chuan, "Direct-a an dawng lo a nih pawhin LEIT department hnena puktir a ni. Learn and Earn-in Japan atana puktir an ni. An la rûl lo," a ti.

Hemi chunghchangah hian chief minister Lal Thanhawla chuan, NLUP sum pûktir chu ṭangkai taka hman a nia sawiin, "Japan mite an embassy hriatpuinain an lo kal a, a hmanhmawhthlak avangin tih bawrh bawrh a ni," a ti a; sum hmangin Japan-ah Mizo ṭhalaite lehkha zir paha inhlawh tura tirh an nih thu a sawi.