Saitual district tipuitling tura nawr an tum

Saitual District Implementing Demand Committee (SDIDC) chuan thuchhuah siamin, district headquarters atana Saitual puan tawh tipuitling tura sorkar nawr nan remchang hmasa berah total bandh huaihawt an tum thu leh, Aizawl-Champhai kawng dan an tum thu an tarlang.

SDIDC chuan, Saitual district tihpuitlin phûtin tharum tel loin kum 44 chhung hma an lak tawh thu sawiin, "Hma kan laknain tun thlenga awmzia a la neih loh avangin, hreh tak chungin ko kan thlak dawn ta a ni," an ti a; hmalak an tum dante an puang.

SDIDC chuan, March 2, 2018-a SDIDC huaihawta tlawmngai pawl hrang hrang leh khaw ṭhenawm (contituency dang) aiawhte kal khawmin hmalak dan tur lungrual takin an pawm niin an tarlang. An tarlan danin, Ṭawi East Block Congress party chu block aṭanga unit thlengin an party seal-te headquarters-ah April 2018 ral hma ngeia pe lut vek tura tih an ni.

Remchang hmasa berah Saitual bial leh demand area khaw hrang hrangah total bandh siam a, bandh ṭan aṭangin Aizawl–Champhai kawng a ṭul chen chen dan an tum. Kum 2018-a inthlan turah, Election Code of Conduct-in a phuar hma ngeiin sorkarin Saitual district a tipuitling lo a nih chuan, Ṭawi bialah candidate siam lo turin Congress party an chah a, "Candidate an siam a nih chuan a ṭul angin SDIDC-in hma a la ang," an ti.

Tih tak zeta district dil rei ber leh awmchhun an nia sawiin SDIDC chuan, "Kum 1974 aṭang tawhin hruaitu hmasate'n an dil tawh a, sorkar a inthlak apiangin theihtawpin hma kan la ṭhin," an ti a; District Re-organisation Committee tehfung siama tling awmchhun an niin an tarlang.

SDIDC chuan, Sairual bial chu Congress khai­dingtu an nia sawiin, "Congress ministry tan hlamchhiah a thiang lo," an ti a; Congress party an tlakchhiat lai ber, Mizoram hmar lam zawng zawnga an tlak phiar lai pawha thlang tling tlattu an nih thu an tarlang bawk.