Zoram mamawh ber beiseina thar - Duhoma

ZNP president Lal­duhoma chuan, Mizorama sorkarna chelh tawhtute chu Mizo mipuite tibeidawngtu an nih thu sawiin, "Zoram hian a mamawh ber chu beiseina thar a ni," a ti.

Lalduhoma hian ni­mihn khan Zoram peoples' Movement (ZPM) pisaa inkhawmah thu sawiin, "Tun dinhmunah kan rama sorkarna siam tawh­tute’n mipui min tibei­dawng a, kohhran pawh a beidawng hial. Sorkarna la siam ve lo, tihsual la nei lote thlengin sorkar tawhte avangin kan rin loh phah a ni," a ti a; sorkarna siam tawhte avangin mipuiin, ‘Tu pawh sorkar se eng an ni chuang lo ang’ tih rilru an put phah fo thu a sawi.

Lalduhoma chuan, beidawnna chu setana hmanrua a ni a, Pathian hmanrua chu beiseina a ni tih sawiin, "Keini hi Zoram mipui tibei­dawngtute kan ni lo, sorkarna siam tawh leh chelh mektute avangin Zoram mipui an beidawng a ni. Kan ram hi siamṭhat theih a la ni a, kan la chhe vek lo. Kohhran ṭha tak, ṭhalai pawl, pavalai, zirlai pawl, khawvel hmun dangin an neih aia ṭha tlawmngai pawl kan nei. I beidawng lo ang u, kan ram hi siamṭhat theih a la ni," tiin, Mizo mipuite a sáwm.

ZPM inkhawmah hian ZPM general secretary K Sapdanga'n report a pe. K Sapdanga sawi danin, ZPM hian March 26 zanah Bairabi-ah ‘Ramri seminar’ an buatsaih dawn a, March 27 zanah Kolasib-ah leh March 28 zanah Kawnpuiah seminar an buatsaih leh bawk ang. Ramri seminar an neihah hian ZPM hruaitute leh ZPM-a tel pawl hruaitute resource person an ni dawn a ni.

ZPM inkhawm hi ZPM Steering Committee chairman Lalliansawta’n a kaihruai a; hunserh hmangtu Maj. Kapluaia chuan, "Kan ram hian mi tak tak ram hruaitu kan thlir a, kohhran pawhin kan thlir. Sakhaw puithiam chirhtheh ngam ram hruaitu kan nei hi kan zak khawp mai. Mizoram mipui hi tun dinhmunah hian kan beidawng a, thutiama ding nghet kan ram chhanchhuaktu tur kan zawng mek a ni," a ti.