Tahan Chapchar Kût Zorama'n a hmanpui

Tahan, Myanmar-ah nimin khan Chapchar Kut hman a ni a, MNF president Zoramthanga kût pa a ni.

Zoramthanga chuan, India ram leh Myanmar rama Mizote chu loh theih lohna vangin international border-in a daidang rih tih a sawi rualin, "Culture, society, sakhua, economic-ah leh kawng hrang hranga kan inlaichina leh thisena thlah khat kan nihna hi engti zawng mahin a danglam dawn lo," a ti.

Hmun hrang hranga Mizote chu harsatna hrang hrangin a nuai velna karah awm rih mah se, India, Bangladesh leh Myanmar-a Zo fate chu thukhat vuain engtik hunah emaw chuan ram khatah an la awm ngei a beisei tlat thu sawiin Zoramthanga chuan, "Chumi atan chuan kan bei dawn a ni," a ti a; MNF an sorkar chuan Myanmar leh Mizoram inkalpawhna kawng an ngaih pawimawh tur thu a sawi.

Tahan-a Mizote hian Chapchar Kût an hmang tawh ṭhin a, chhan hrang hrang vanga hun eng maw chen an hman theih loh hnuah, kum 2003 aṭangin an hmang leh a ni.

Zoramthanga hian Rangoon, Naypyidaw, Mandalay, Myohla leh Hakha-te a tlawh bawk a; Hakha-ah Chin state chief minister Lianluaia nen an inkawm. Falam, Tedim, Khampat, Kanan, Hmunṭha, Zohmun, Tahan Theological College leh Tahan-a TNT hmunte a tlawh bawk.