VIP-te'n helicopter vawi 69 an hmang

General Administration Department (GAD) changtu CM Lal Thanhawla chuan, kum 2013 aṭanga nimin thleng khan Governor, Chief Minister leh VIP dangte'n helicopter vawi 69 an hman (chartered) thu MNF member Dr K Beichhua zawhna chhangin House a hrilh.

Chief Minister tarlan danin, helicopter hi Chief Minister-in vawi 53, Governor-in vawi 10 leh VIP dangin vawi ruk an hmang. A hman man chu darkar khatah Rs. 70,000 a ni ṭhin a, January 2018 aṭangin darkar khatah Rs. 80,000-ah tihsan a ni. Helicopter hi aṭulah hman ṭhin a ni a, a ṭul loah chuan hman a ni ngai lo niin GAD Minister chuan a sawi.

Chief Minister chuan, helicopter hman man chu sorkar laipuiin 75% a tum thu sawiin, helipad siam belh zel tum a nih thu a sawi. Mizoramah helicopter pakhat chiah a service avangin a indaih loh thu sawiin Lal Thanhawla chuan, "Pahnih service tir turin ngaihtuahna sen a ni a, uluk taka ngaihtuah a ni. Pawan Hans lam pawhin pahnih service tir an remti," a ti.