Aitlangah kawng laih chhunzawm a ni ; Assam-in JCB chahbi leh phone la kawl

Assam police-te'n September 2, Ningani chawhnu dar 1:30 vela Vairengte khaw chhung aṭanga Aitlang ram panna tur kawng laitu excavator (JCB) chahbi leh a khalhtu (operator) mobile phone an chhuhsak chu nimin tlai thleng khan an la pe kîr lo. Kawng laih hi nimin khan Mizoram police venna hnuaiah chhunzawm a ni.

Tarlan tawh angin, Assam police mi 50 vel chu Ningani chawhnu dar 1:30 vel khan Aitlang hmuna Lalnarammawia s/o R Biakmawia (L), Kolasib Vengtharin JCB hmanga kawng a lài lái chu an tibuai a, kut an thlak bakah, a mobile phone leh excavator chahbi an chhuhsak a, kawng lai chhunzawm lo turin an vau a ni.

Lalnarammawia hian puitu zawngin a au a, hna thawk ve dangte an tlàn khawm chuan Assam police-te chu an kal kiang tawh a ni.

Thil thleng chungchangah hian Kolasib SP Vanlalfaka Ralte chuan Hailakandi SP be nghalin, chahbi leh mobile phone dah lêt turin a hriattir a ni. Hailakandi SP chuan, a tìrah an naute'n Lalnarammawia an khawih nia sawi chu pha mah se, a hnuah erawh kawng laih chhunzawm tawh lo tura an tih ngei thu a sawi. Chabi leh mobile phone erawh an naute'n an laksak loh thuin a ṭang tlat thung.

Kolasib DC Dr H Lalthlangliana pawhin Hailakandi DC hnenah lehkha thawnin, thil thleng chungchangah action la tur leh chahbi leh mobile phone dah let turin a hrilh.

Aitlangah hian nimin khan kawng laih chhunzawm a ni a, Kolasib SP Vanlalfaka Ralte hoin police-te'n an veng a, hnathawk rawn tihbuai leh an tum a nih chuan lo kah an tum nia thudawn a ni. Hna thawh a nih chhungin Assam police-te an lang lo.

Kolasib Excavator Backhoe Loader Operator Association (KEBOA) chuan thuchhuah siamin, Mizoram leh Assam ramri buai karah police camp pawhna tur kawng laiin an thawh chhuah thu an tarlang a, "Kan sahimna tur Kolasib District Magistrate-in ziaka min tiam thlap laia venhimna pek kan nih loh avanga kut tuar kan awm hi pawi kan tiin ná kan ti tak zet a ni," an ti.

KEBOA tarlan danin, an member Lalna­rammawia chu Assam police-te'n kut an thlak avangin a nâk ruh a auh a, a bengah thi chhuakin, a tâi velah an khawih avangin a zun a thi bawk.

Lalnarammawia chu zángnadawmna pe turin Assam leh Mizoram sorkar an phût a, "Assam police-te'n an laksak JCB chahbi leh mobile phone la let ngei turin thuneitute kan phût. Kan him lo nia kan hriat chuan ramri hnaiha hnathawh hi kan tan a chakawm tawh lo hle ang tih Mizoram sorkar hian min hriatsak se kan duh hle a ni," an ti.