Chief Minister-in Tourist Circuit a hawng

Serchhipa Integrated Tourist Circuit siam thar chu nimin khan chief minister Zoramthanga'n a hawng. Tourist Circuit hi paragliding hmun behchhana siam niin, guest house, car parking, nature trail leh thil dangte siam a ni a, a siam nan North Eastern Council (NEC) sum nuai 468.81 hman a ni.

Chief Minister chuan, paragliding hmun ngêlnghet leh a beh­bâwm hrang hrang, khualzin hîp theitu hmun ṭha tak ruahman a ni tih sawiin, "Mizoram leh a bikin Serchhip khaw mipui tan kawng hrang hranga hlâwkna thlentu a nih ka ring. Tourism tihhmasawn zelna turah hmathlir thui tak nei chunga ruahmanna siam a pawimawh," a ti.

Mizoram chu kawng hrang hranga hmasawn theihna nei a nih thu sawiin Zoramthanga chuan, "Chu hmasawnna thlen tur chuan rilru zau tak nen taimakna nen bawhzui a ngai," a ti a; tourist circuit angah leh hmasawnna ruhrel dang din turah ngaihtuah tur pawi­mawh tak pakhat chu tui hnar a nih thu a sawi.

Tourism minister Robert Romawia Royte chuan, adventure sport-ah Mizoram chauh ni lo, India ramin bung thar a kai ta niin a sawi a; international event thleng zel thei tura hmathlir nei turin MASA leh Serchhip district hotute a chah.

Khualzahawm Lal­duhoma, bialtu MLA chuan, paragliding lamah ṭhalaite an tui thar a beisei thu sawiin, Tourist Circuit chuan eizawnna kawngah Serchhip tan rah ṭha a chhuah ngei a beisei thu a sawi.