US dollar nuai 400 hû project Health Minister-in a hawng

World Bank Group-in Mizoram hriselna tihhmasawnna tura US dollar nuai 400 hû project a ruahman, Mizoram Health Systems Strengthening Project (MHSSP) chu nimin khan Taxation auditorium-ah Health minister Dr R Lalthangliana'n a hawng.

Health Minister chuan, Mizoram sorkar thupui ber pakhat chu nunna chhanhim a nih thu a sawi.

MHSSP tihhlawhtlinna tur hian Washington DC leh New Delhi a World Bank office-te chu amah ngeiin a dawr ṭhin thu sawiin R Lalthangliana chuan, "Mi dangte entawn tlak leh zir chian tlakin hma kan la ang a, hna kan thawk dawn a ni," a ti.

World Bank hnuaia MHSSP-ah hian Health department chu imple­menting agency a ni a, kum nga chhunga thawh tur a ni. US dollar nuai 400 zinga dollar nuai 320 (80%) chu World Bank-in an tum dawn a, dollar nuai 80 (20%) chu Mizoram sorkarin a tum ang.

World Bank aṭanga sum hmuh dollar nuai 320 rulh dan tur chu - sorkar laipuia Department of Economic Affairs (DEA), Ministry of Finance-in 90% a rûl dawn a, Mizoram sorkarin 10% a rûl ve thung dawn a ni.