KHAWTHLIR

Thisen pe
Chanmari West Branch YMA chuan nimin khan an vengah thisen pek rûnpui huaihawtin, Aizawl Civil Hospital tan thisen unit 171 an pe a, petute mipa 148 leh hmeichhia 23 an ni.

MRB branch hawng
Mizoram Rural Bank (MRB) general manager C Ramdinsanga chuan nimin khan MRB, Kawrtethawveng Branch thar a hawng a, MRB branch 92-na a ni. Bank hawnnaah hian bialtu MLA Lalrindika Ralte pawh a tel a; nimin khan deposit cheng nuai 50 vel an hmu nghal a ni.

Covid-19 vei thi
Covid-19 vei enkawl lai R Lalmuana (70), Zuangtui chu nimin tlai dar 5:30 khan State Referral Hospital-ah a thi a, hripui vanga thi 220-na a ni. Covid-19 positive a ni tih September 1, Nilaini khan hmuh chhuah a ni a, SRH-ZMC-ah enkawl nghal a ni.

Lui hmanrua hlân
Irrigation & Water Resources minister C Lalrinsanga chuan nimin khan lui tui luangzat tehna hmanraw chi hrang hrang - acoustic doppler current profiler, acoustic doppler velocitimeter, current meter leh a khaihhnawih dangte Aizawl, Lunglei, Champhai leh Kolasib IWR division-te hnenah a hlan. Hmanruate chu National Hydrology Project hnuaiah cheng nuai 184.12 sênga lei a ni.

Kawng siam enfiah
Lawngtlai DC Dr Andrew H Vanlaldika chuan September 2, Ningani khan Central YLA hruaitute nen Lawngtlai leh Lunglei inkara national highway kawngpui zauh hna thawh mek an enfiah. Mizo 3rd IR Batallion hmun, Thingkaha covid care centre an tlawh nghal bawk.

Home Guard la dawn lo
Mizoram Home Guard Volunteers Union chuan thuchhuah siamin, social media-ah MRHGCD hna dil theih tih leh MRHG police constable job vacant tihte a darh thu an tarlang a, "Hetiang hna lak tumna hi a awm rih lo," an ti. Home department leh MRHG Hqrs. office-a zawtfiah leh dilna thehluh tum hmun hla tak tak aṭangtein an awm thu leh mi tam tak harsatna an tawh phah avangin thu dik lo thehdarhtute an dem thu an tarlang.

Mamit tui bill pekna
Mamit DC Dr Lalrozama chuan nimin khan online kallanga tui bill pekna a hawng. Bill pekna hi Mamita chhungkaw 1,557, Dâmpuia chhungkaw 50 leh Rawpuichhipa chhungkaw 89-te'n an hmang thei dawn a; phedmizoram.in/billpayment.php emaw, G-pay, Paytm, SBI-YONO, BHIM leh mobile payment application dang hmangin pek theih a ni.