COVID-19: Mizoram dinhmun ; Hripui vei 882 hmuh belh a ni
September 2, Ningani khan Mizoramah Covid-19 vei mi 882 hmuh chhuah a ni a, August 16, 2021 hnua a vawi khat nan enkawl mek mi sîng an tling leh tawh. Nimin khan hripui vei dam tawh mi 373 chhuahtir an ni a, hripui vangin mi pakhat a thi.
Covid-19 vei hmuh tharte chu mipa 411 leh hmeichhia 471 an ni a; ZMC laboratory-a hmuh chhuah 203, TrueNAT hmanga hmuh 51, RAT hmanga hmuh 613 leh FIA hmanga hmuh 15 an ni. Mi 882-te chu symptom nei 434 leh nei lo 448 an ni a; tualchhunga kái 878 leh state pawn aṭanga lut pali niin, tualchhunga kái zingah kàina chin hriat loh 260 an awm.
Ningani khan Mizoram chu India rama state leh union territory 36 zingah hripui vei hmuh thar tam lamah parukna a ni a; Mizoram aia hmuh chhuah tamnate chu - Kerala, Maharashtra, Tamil Nadu, Andhra Pradesh leh Karnataka-te a ni.
IDSP record angin, Mizoramah Covid-19 vei 61,992 hmuh chhuah a ni tawh a, mipa 31,581 leh hmeichhia 30,411 an ni. Nimin tlai dar 5 thleng khan mi 51,763 (83.50%) chhuahtir an ni tawh a, mi 220 (0.35%) thi tawhin, enkawl mek mi 10,009 (16.15%) an awm.
September 2, Ningania sample endik dan chu - ZMC laboratory-ah 1,101, TrueNAT hmangin district pariatah 394, RAT hmangin district 11-ah 4,977 leh Fluorescent Immunoassay (FIA) hmangin 19 a ni a, a vaiin sample 6,491 a ni. Sample endik aṭanga hripui vei hmuh chhuah 882 chu 13.59% a ni a, ZMC-ah 18.44%, TrueNAT-ah 14.54%, RAT-ah 12.32% leh FIA-ah 78.95% a ni.
District tinah Covid-19 vei hmuh chhuah dan chu - Aizawlah mi 470, Kolasib-ah 97, Lungleiah 93, Champhaiah 66, Lawngtlaiah 45, Mamitah 38, Siahaah 32, Khawzawlah 22, Serchhipah 16 leh Hnahthialah pathum a ni. Hmuh chhuah thar 882 zingah nausen kum khat tling lo 12 telin, a naupang ber chu ni 10-a upa a ni a; kum 90 chung lam pahnih an awm bawk.
Mizorama Covid-19 vei hmuh tawh zat 61,992 chu kum 2011 chhiarpui angin, Mizorama mi 1,000 zelah hripui vei mi 56 an awm ang a ni. Nimin khan tlai dar 5 thlengin hripui laka fihlim tawh mi 373 chhuahtir an ni a; Aizawl district-ah mi 231, Kolasib district-ah 80, Mamit district-ah 36, Hnahthial district-ah 16, Champhai district-ah pasarih leh Serchhip district-ah pathum an chhuak.
Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a; ZMC-ah positive 14,048 hmuh chhuah a ni tawh a, TrueNAT-PCR hmangin 3,572, RAT hmangin 44,304, FIA hmangin 67 leh Guwahati-ah pakhat hmuh chhuah a ni tawh. IDSP tarlan danin, September 2, 2021 thlengin Mizoramah swab sample 8,88,587 endik a ni tawh a, chu'ng aṭanga Covid-19 vei hmuh tawh zat 61,992 chu 6.98% a ni. Hripui vei hmuh tawh zinga mi 57,641 chu Mizoram chhunga kái chhâwng an ni a, mi 4,351 chu Mizoram páwn aṭanga an rawn luh hnua hmuh chhuah an ni.
