Aizawl District Teachers’ Award hlân

Aizawl District Education Office chuan nimin khan School Education directorate conference hall-ah Aizawl district-a zirtirtu ṭha chawimawina, Aizawl District Teachers’ Award hlanna inkhawm an buatsaih a, zirtirtu pathum hnenah chawimawina an hlân.

Kumina Aizawl District Teachers’ Award sem ṭum hnihnaah hian thuchei leh Rs. 5,000 hlan a ni a; chawimawina dawngtute chu - Tanhril P/S-I headmistress J Hmingduhawmi, Dinthar M/S-II headmaster H Lalhlimthanga leh Tuikual North H/S zirtirtu Michael Lalramliana te an ni.

Zirtirtu ṭha chawimawina hlan inkhawma khuallian, School Education director James Lalrinchhana chuan, zirtirtute chu zirna tihhmasawnna tura a laimû, hmun pawimawh ber luahtu an nih avangin ram pum, state leh district huapin hna thawk ṭhate chawimawina pek ṭhin a nih thu a sawi.

James Lalrinchhana chuan, teachers’ award dawngtute chu tehfung chi 11 hmanga teh an nih hnua award dawng tura thlan an nih avangin belhchian dâwl tak an nih thu a sawi a; Mizorama zirtirtute chu tinzawn (target planning) nei tura fuihin, "Kum tin target neia hma kan lak chuan kum nga chhung chuan nasa takin hma kan sawn thei dawn a ni," a ti.

Award semna inkhawmah hian School Education department officer te, zirtirtu ṭha chawimawina national award leh state award dawng tawh ṭhenkhatte an tel a ni.