Deputy Chief Minister-in Kolasibah Bawlhhlawh sâwngbàwlna a hawng

Deputy chief minister Tawnluia chuan nimin khan Kolasib-ah bawlhhlawh sawngbawlna hmun - Solid Waste Management Centre (SWMC) a hawng.

Tawnluia chuan, hun engemaw chen Aizawlah SWMC kalpui chhin a nih thu sawiin, "Harsatna awm theite zir chian a lo ni tawh a, Kolasib-a SWMC hi chutiang harsatna awm ve lo tura beisei a ni," a ti a; hlawhtling leh ṭangkai taka hman a nih theih nan thawktute bakah, pawlte leh mipui inpekna a pawimawh thu a sawi.

Bawlhhlawh sawngbawlna hmun a bawlhhlawh atanga leiṭha siam lehna tur hmun awmte leh ṭawih thei lote sum a chan tir tura K-NO-W WASTE Pvt. Ltd te nen a inremsiamna tha tak a awm chu lawmawm a tih thu sawiin Dy. CM chuan, "Hriselna atan a hlauhawm bawlhhlawh paihna tur pawh ruahman fel a ni a, ṭangkai tak a hman a nih thuai theih nan phalna dil ngai awmte pawh bawhzui mek a ni," a ti.

Hawnna inkhawmah hian minister of state K Lalrinliana leh MLA C Lalmuanpuia te pawh an tel a; K Lalrinliana chuan, UDPA department hmalaknain four lane kawngpui paltlangna tur Kolasib town plan ruahman a nih thu a sawi.

Kolasib SWMC siam nan Swachh Bharat Mission (Urban) aṭangin cheng nuai 668 leh SEDP aṭangin cheng nuai 40 hmuh a ni a, a vaia sen chu cheng nuai 708 a ni. Kolasib aṭanga km. 7 vela hlaah a awm a, ram hectare 3.44 (sqm. 34,400)-a zau a awh. Bawlhhlawh ṭawih thei leh ṭawih thei lo paihna tur bawlhhlawh báwm 7,300 sem a ni a, May 2021 aṭangin bawlhhlawh thliar sate chu lak khawm ṭan a ni.