Zirlaite ngaihthahah HTE Minister puh

National Students' Union of India (NSUI), Mizoram chuan thuchhuah siamin, Higher & Technical Education minister Dr R Lalthangliana chu zirlaite dawn tur post matric scholarship ngaihsak loah leh zirlaite ngaihthahah an puh.

NSUI chuan, zirlaite'n tribal post matrict scholarship kum tina an dawn ṭhin chu Mizoram University, ZMC, RIPANS leh college zirlaite chauhin an la dawng tih sawiin, "A bak zirlai eng emaw zat, pawl 12 leh Mizoram chhung leh state páwna zirlai eng emaw zatin an la dawng ve lo. Zirlaite'n nghakhlel taka an thlir tun thlenga an la pe thei lo hi a pawi tak zet a ni," an ti.

NSUI Mizoram chuan, "Tun thlenga scholarship la hmu lo zirlai eng emaw zat an awm laia tun hnaia HTE minister Dr R Lalthangliana Delhi kala office zuk dawr chuan zirlaite harsatna a rawn chinfelsak kan beisei laiin, eng mah hmalakna a rawn nei lo hi zirlai ngaih pawimawh lohnaah kan ngai," an ti a; HTE Minister chu zirlaite harsatna a bawhzui thei lo a nih chuan, a bawhzuitu tur department officer ruata hma laktir thuai turin an phût a ni.